अभिषेक अधिकारी
पोखरा ।
पछिल्लो समय कोभिड संक्रमणको दर बढेको बढ्यै छ । तर परीक्षणको दर खासै बढेको छैन । त्यसमाथि परीक्षण गर्ने प्रयोगशाला पहिलाको तुलनामा थपिएको छैन । स्वास्थ्य तथा जनसंख्या मन्त्रालयका अनुसार ११ जिल्ला रहेको गण्डकी प्रदेशमा कोभिड परीक्षण गर्ने ६ प्रयोगशााला छन् ।

पोखरामा ३, नवलपुर, बागलुङ, तनहुँमा १÷१ प्रयोगशालामा कोभिड १९ जाँच हुन्छ । अरु जिल्लामा कोभिड जाँच्ने प्रयोगशाला छैनन् ।
देशभर संक्रमण बढ्दै जाँदा कास्कीमा पनि खतरा बढेको छ । गण्डकी प्रदेश स्वस्थ्य निर्देशनालयका अनुसार प्रदेशभर सक्रिय संक्रमितको संख्या १ हजार ५ सय नाघेको छ । कास्कीमा सर्वाधिक ८ सय ८० सक्रिय संक्रमित छन् । प्रदेशभरका संक्रमितमध्ये ४५ जनामात्र अस्पतालमा छन् । अन्य संक्रमित होम आइसोलोसनमा छन् ।

पछिल्लो २४ घण्टामा प्रदेशभर ८ सय ३७ जनामा गरिएको परीक्षणमा ३ सय ७८ जनामा संक्रमण पुष्टि भएको निर्देशनालयको सोमबार जारी गरेको विज्ञप्तिमा उल्लेख छ । कास्कीमा १ सय ८६, स्याङ्जामा ६३, गोरखामा ४५, नवलपरासीमा ३४, तनहँुमा ३१, बागलुङमा ९, लमजुङमा ४, पर्वतमा ३, म्याग्दीमा २, मुस्ताङमा १ संक्रमित थपिएका छन् । पछिल्लो २४ घण्टामा २२ संक्रमण मुक्त भएका छन् ।

गण्डकीका डाक्टरहरुले निशुल्क परीक्षणको समय व्यवस्थापन नमिलेको र प्रचार नभएको बताएका छन् । समयमै परीक्षण गर्न नपाउँदा र कहाँ परीक्षण निशुल्क गरिन्छ भन्ने थाहा नहुँदा सर्वसाधारण र स्वास्थ्यकर्मीलाई मात्र नभई समग्र देशलाई नै असर गरेको बताइन्छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभर ४ हजार ९ सय ६१ संक्रमित थपिएका छन् । अब देशभर सक्रिय संक्रमितको संख्या २ हजार ५ हजार ६ सय ८० पुगेको छ ।