काठमाडौं ।
सरकारले सार्वजनिक यातायातका साधनको भाडा बढाएको छ । सरकारले गाडी भाडा १३ प्रतिशतसम्म बढाएको हो ।
तेलको मूल्य वृद्धि भइरहँदा यातायात व्यवसायीले दबाब दिएपछि सरकारले सार्वजनिक सवारी साधनमा भाडा बढाएको हो ।

भौतिक पूर्वाधार तथा यातायात मन्त्रालयले मन्त्रिस्तरीय निर्णय गर्दै प्रदेशस्तरमा सञ्चालन हुने सार्वजनिक यातायातमा हाल कायम रहेको दरमा ११ देखि १३ प्रतिशतसम्म भाडा वृद्धि गर्ने निर्णय गरेको हो । यो निर्णय २० गतेदेखि लागु हुने र नयाँ भाडादर यातायात व्यवस्था विभागले सार्वजनिक गर्ने नेपाल यातायात व्यवसायी राष्ट्रिय महासघंका महासचिव सरोज सिटौलाले जानकारी दिए ।

इन्धनको मूल्य ५ प्रतिशत तलमाथि भएपछि गाडी भाडा स्वचालित रूपमा घटबढ हुने विभागका एक कर्मचारीले जानकारी दिए । २० गतेदेखि लागु हुने नयाँ भाडा १० देखि १५ प्रतिशत बढ्ने उनले जानकारी दिए ।

मन्त्रालयले एक प्रदेशबाट अर्को प्रदेशका लागि चल्ने यात्रुबाहक तथा मालबाहक सवारीसाधनमा मात्रै भाडा बढाएको यातायात व्यवस्था विभागका महानिर्देशक नमराज घिमिरेले बताएका छन् । रुस–युक्रेन युद्ध सुरु भएसँगै पछिल्लो समय तेलको भाउ लगातार बढिरहेको छ ।

विभागले सार्वजनिक यातायातको भाडामा चैत ७ गतेदेखि नै स्वचालित प्रणाली लागु गर्न प्रक्रियाअघि बढाएको जनाएको थियो । गाडी भाडा बढ्ने १३ सूचकमध्ये इन्धन प्रमुुख हो । यसले ३५ प्रतिशत हिस्सा ओगटेको छ । अन्य सूचकको वार्षिक रूपमा समायोजन गरिने २ चैत २०६५ मा निर्णय भएको थियो ।

अरु १२ सूचक छन् । अर्को एउटा सूचक अनुसार गाडीका पार्टपूर्जासहित अन्य पक्षको मूल्यवृद्धि भएमा हरेक वर्ष चैतमा सार्वजनिक यातायातका साधनको भाडादर समायोजन हुनेछ ।

सवारीको वैज्ञानिक भाडा समायोजन गर्ने व्यवस्था अनुसार अहिलेसम्म पेट्रोलियम पदार्थमा ५ रुपैयाँ मूल्य घटबढ भएपछि भाडा समायोजन हुने व्यवस्था थियो । तर, यो व्यवस्था प्रभावकारी नभएपछि भौतिक, पूर्वाधार तथा यातायात मन्त्रालयले यातायात व्यवस्था विभागको प्रस्तावअनुसार ५ प्रतिशतको प्रावधान राखेको हो । स्वचालित भाडा प्रणाली लागू भएसँगै अब सार्वजनिक यातायातको मूल्य बढाउनका लागि मन्त्रीस्तरीय निर्णय वा मन्त्रिपरिषद् निर्णय कुनुपर्ने छैन ।