पोखरा ।
पोखराका युवाहरूको एक संस्थाले स्थानीय निर्वाचनमा प्रमुख पदमा उम्मेदवारी दिएका व्यक्तिहरुका लागी ’मेरो उम्मेदवारी, योजना तथा प्रतिबद्धता’ विषयक प्रस्तुतिकरण कार्यक्रम आयोजना गर्ने भएको छ ।

पोखरा महानगरपालिका २४ कास्कीकोटलाई केन्द्र बनाई विभिन्न समयमा विभिन्न रचनात्मक कार्यक्रम गर्दै आइरहेको हाम्रो कास्कीकोट युवा संजालले बिहिवार पत्रकार सम्मेलन मार्फत उक्त कार्यक्रमबारे जानकारी गराएको हो ।

आउँदो वैशाख १८ गते आइतबार संचालन हुन लागेको उक्त कार्यक्रममा पोखरा महानगरपालिकाका मेयर तथा वडा नम्बर २४ का वडा अध्यक्ष पदका उम्मेदवारले आफ्नो चुनावी एजेन्डा सहितको प्रस्तुतिकरण दिनेछन् ।

सबै राजनीतिक दलका उम्मेदवार र स्वतन्त्र उम्मेदवारको समेत उपस्थिति रहने हुँदा कार्यक्रम सम्भवतः नेपालमै एउटा नयाँ प्रयोग हुने र स्थानीय निकायको बागडोर सम्हाल्न तम्सिएका उम्मेदवारमा हुनुपर्ने सञ्चार, व्यवस्थापन, प्राविधिक र नेतृत्व सम्बन्धि दक्षता परिक्षण गर्न कार्यक्रम फलदायी हुने अपेक्षा राखिएको पत्रकार सम्मेलनमा संस्था संयोजक शालिकराम (शितल) गिरीले बताए ।