पोखरा l
गठबन्धनको तर्फबाट मादी गाउँपालिकामा उम्मेदवारी दिएका अध्यक्ष र उपाध्यक्षका प्रत्यासीले गाउँपालिकास्तरीय प्रज्ञा प्रतिष्ठान स्थापना गर्ने प्रतिबद्धता जनाएका छन् । यहाँ गठबन्धनबाट अध्यक्षमा नेपाली कांग्रेसबाट देवीजंग गुरुङ र उपाध्यक्षमा नेकपा माओवादी केन्द्रबाट लालबहादुर गुरुङ उम्मेदवार छन् ।

उनीहरुले निर्वाचन जितेमा मादी प्रज्ञा प्रतिष्ठान स्थापना गर्ने र त्यसबाट मादी क्षेत्रका कलाकारलाई प्रत्यक्ष फाइदा हुने दाबी गरे । मादीमा अहिले ८५ जनाभन्दा बढी कलाकार छन् । यसअघिको नेतृत्वले नगरेको काम काम गठबन्धनका उम्मेद्वारले गर्ने प्रतिवद्धता गरेको चुनाव प्रचारप्रसार समितिले जनाएको छ ।

नेपाल सांस्कृतिक संघका केन्द्रीय उपसभापति कृष्णकुमार गुरुङले सामुदायिक राज्य स्थापित गर्नका लागि पनि मादीमा प्रज्ञा प्रतिष्ठान आवश्यक रहेको जनाए । मादीमा प्रतिष्ठान पहिला नै आवश्यक भए पनि एमाले नेतृत्वको तीनै तहको सरकार हुँदा पनि वास्ता नगरेको उनको आरोप छ । ‘यसभन्दा अघिका अध्यक्ष आफैं जिफानको अध्यक्ष हुन्, म कलाकार हुँ कलाकारिताको विकास गर्छु मेरो ठाउँमा कलाकारिताको विकास गर्छु भनेर भोट मागे पनि प्रतिवद्धता पूरा गरेनन् ।’