पोखरा l
पोखराका ३३ वडामध्ये मंगलबार २ वडाको मतगणना सकिएको छ । पोखरा ३ मा प्रकाशमान उदास वडाध्यक्षमा निर्वाचित भएका छन् । उदास १ हजार २ सय २४ मत ल्याएर वडाध्यक्ष निर्वाचित भएका हुन् । उनका प्रतिस्पर्धी एमालेका विष्णुप्रसाद ख्वाउजूले ६ सय १६ मत पाए ।

पोखरा ३ मा वडा सदस्यमा नविल आलेमगर, सनकमान सिके, शान्तिदवी पराजुली र सवि परियार चुनिएका छन् । वडा नम्बर ४ मा पनि कांग्रेस उम्मेदवार देवकृष्ण पराजुलीको नेतृत्वमा प्यानलै निर्वाचित भएको छ । पराजुलीले ८ सय २० मत पाएका छन् । उनका प्रतिस्पर्धी एमालेका मदनकुमार मुल्मीले ७ सय ५४ मत पाएका छन् । कांग्रेसबाट प्रकाश कोइराला, सञ्जय रानाभाट, पर्वती श्रेष्ठ माकाजू र विष्णुमाया परियार सदस्य चुनिएका छन् ।

सोमबार १, २, १२ र २३ नम्बर वडाको मत सार्वजनिक भएको थियो । मंगलबार रातिसमम मेयरमा एकीकृत समाजवादीका धनराज आचार्यले अग्रता कायम राखेका छन् । आचार्यले ११ हजार ८ सय १२ मत पाउँदा एमालेबाट मेयर उम्मेदवार कृष्ण थापाले १० हजार ६२ मत पाएका छन् । उपमेयरमा पनि गठबन्धनबाट कांग्रेसकी कोपिला रानाभाटअघि छिन् ।

रानाभाटले १२ हजार १ सय ३० मत पाएकी छिन् भने एमाले उम्मेदवार मञ्जुदेवी गुरुङले ११ हजार ४ सय ८३ मत प्राप्त गरेकी छिन् । स्वतन्त्र उम्मेदवार गनेस पौडेलले ६ सय ६९ र राप्रपाका उम्मेदवारले १ हजार २ सय ७१ मत पाएका छन् ।
पोखरा महानगरपालिकामा १ लाख ४३ हजार २ सय २६ मत खसेको छ ।

एमाले उम्मेदवार सहारा प्रधान वडा नम्बर १ को अध्यक्षमा निर्वाचित भएका छन् । त्यस्तै, वडा नम्बर २ मा नेपाली कांग्रेसका दिवसमान प्रधानांग, वडा नम्बर १२ मा पनि कांग्रेसका सन्तोष बास्तोला, पोखरा २३ को वडाध्यक्षमा कांग्रेसका रामकाजी गुरुङ विजयी भएका छन् ।