पोखरा ।
अन्नपूर्ण आरोहण दिवसको अवसरमा ट्रेकिङ एजेन्सिज एसोसियसन अफ नेपाल(टान) पश्चिमाञ्चल क्षेत्रीय संघले आयोजना गरेको कार्यक्रममा पर्वतको लेस्पारलाई पदयात्रा पर्यटनसँग जोड्नुपर्ने बताइएको छ ।

पर्वतको मोदी गाउँपालिका वडा नम्बर ४ स्थित लेस्पारमा आयोजित कार्यक्रमका वक्ताले धेरै सम्भावना भएर पनि ओझेलमा परेको लेस्पार पदयात्रा पर्यटनका दृष्टिले आकर्षक गन्तव्य भएको उल्लेख गरे । मोदी गाउँपालिका अध्यक्ष हिरादेवी शर्माले लेस्पार पदयात्रा पर्यटनका दृष्टिले धेरै सम्भावना भएको बताउँदै यसको प्रवद्र्धन र विकासका लागि सबैको साथ र सहयोगको अपेक्षा गरिन् ।

टान पश्चिमाञ्चल क्षेत्रीय संघका अध्यक्ष सुशीलराज पौडेलले लेस्पारको पर्यटकीय सम्भावनालाई उजागर गर्नका लागि नै यस वर्षको अन्नपूर्ण आरोहण दिवस यस गाउँमा मनाइएको बताए । पदयात्रा पर्यटनसँग गाउँलाई जोड्नसके स्थानीयको आर्थिक समृद्धि बढ्ने बताउँदै उनले स्थानीयलाई उत्पादनसँग पनि जोड्नुपर्ने उल्लेख गरे ।

पर्यटन कार्यालय पोखराका प्रमुख थमनसिंह गौतमले पर्यटन प्रवद्र्धनसँगै स्थानीयलाई उत्पादनसँग जोड्दै रोजगारी अभिवृद्धि गर्नुपर्नेमा जोड दिए । संघका पूर्व अध्यक्ष रामचन्द्र शर्माले पदयात्रामार्गसँग जोडिएको लेस्पारले धेरै सम्भावना बोकेको विचार राखे ।

कार्यक्रम संयोजक एवं टान पश्चिमाञ्चल क्षेत्रीय संघका द्वितीय उपाध्यक्ष कृष्णप्रसाद आचार्यले लेस्पारको पर्यटकीय सम्भावनाको प्रवद्र्धनका लागि अन्नपूर्ण डे यसै ठाउँमा मनाइएको बताए । कार्यक्रममा संघका सहसचिव रेशम अधिकारी, लेस्पार सामुदायिक होमस्टेका सचिव नरसिंह पुन, समाजसेवी टीका पुन लगायतले बोलेका थिए ।