पोखरा ।
जिल्ला समन्वय समिति कास्कीले जिल्लामा निर्माणाधीन विकास आयोजनाको अनुगमन तीव्र पारेको छ । कास्कीको माछापुच्छ्रे गाउँपालिकाको निर्माणाधीन प्रशासकीय भवनको अनुगमन सोमबार भएको छ । सो क्रममा निर्माण चरण, प्रक्रिया, गुणस्तर, मापदण्ड र बाँकी कार्यका बारेमा जानकारीसहित सूक्ष्म निरीक्षण तथा अनुगमन गरिएको हो ।

६ करोड ६२ लाखमा निर्माण सम्झौता सम्पन्न सो भवनको निर्माण कार्यको गुणस्तरीयतामा कुनै कसर बाँकी नराख्न र समयमै सम्पन्न गर्न निर्माण कम्पनी ‘नयाँ बाटो जिएस इन्जिनियरिङ जेभीलाई आग्रह गरियो । जिल्ला समन्वय कास्की प्रमुख लीलाधर पौडेलको नेतृत्वमा, उपप्रमुख सरिता माल, जिसस सदस्यद्वय लक्ष्मी दमै र सुकमाया नेपाली, जिल्ला समन्वय अधिकारी नवराज बरालसहित, माछापुच्छ्रे गाउँपालिकाका गाउँपालिकाका अध्यक्ष मीनबहादुर गुरुङ, उपाध्यक्ष सीता अधिकारी इन्जिनियर तथा प्राविधिक र कर्मचारी र सरोकारवालाको सहभागितामा अनुगमन गरिएको हो ।