पोखरा ।
संयुक्त बजार अनुगमन समिति गण्डकी प्रदेशले प्रशोधित पानी उच्च मूल्यमा बेचेको पाएपछि स्पष्टीकरण सोधेको छ । समितिले पेपे रेस्टुरेन्टसँग स्पष्टीकरण मागेको हो ।

आइतबार अनुगमनका क्रममा न्युरोडस्थित भाटभटेनीको माथिल्लो तलामा रहेको पेपे रेस्टुरेन्टले पानीको बोतल ५० रुपैयाँमा बिक्री गरेको पाइएकाले स्पष्टिकरण मागिएको उपभोक्ता मञ्च गण्डकी अध्यक्ष कपिलनाथ कोइरालाले जानकारी दिए । ‘रेस्टुरेन्ट सञ्चालकलाई ३ दिनभित्र जिल्ला प्रशासन कार्यालय कास्कीमा आएर स्पष्टीकरण दिन भनेका छौं,’ उनले भने ।

गण्डकी प्रदेश अनुगमन समितिका निर्देशक नारायण आचार्यको नेतृत्वमा आइतबार नै जिरो किमीका २ फर्ममा अनुगमन गरिएको छ । अनुगमनका क्रममा हाम्रो सम्झाना सपिङ सेन्टरमा कागजपत्र अपडेट नगरेको र मागेका कागजपत्र उपलब्ध गराउन नसकेको भन्दै ५० हजार जरिवाना गरिएको छ । उपभोक्ता संरक्षण ऐन २०७५ को दफा १५ बमोजिम सेन्टरलाई जरिवाना गरिएको कोइरालाले बताए । यस्तै, कृष्ण पार्वती स्टोर्समा बिल बिजक अपडेट नपाइएपछि जरिवाना गरिएको छ ।

उपभोक्ता संरक्षण ऐन २०७५ बमोजिम स्टोर्सलाई २० हजार जरिवाना गरिएको हो । प्रदेश अनुगमन कार्यालय, जिल्ला प्रशासन कार्यालय, प्रहरी, खाद्य प्रविधि तथा गुण नियन्त्रण कार्यालय र उपभोक्ता मञ्चको टोलीले अनुगमन गरेको हो ।