मोहसिन अली मियाँ
गोरखा

गण्डकी प्रदेशका भौतिक पूर्वाधार विकास मन्त्री रामशरण बस्नेतले विकासका काममा विवाद गर्न नहुने बताएका छन् । आरुघाट गाउँपालिका ५ को आर्बाङमा वडा कार्यालय भवन उद्घाटन गर्दै मन्त्री बस्नेतले विकास निर्माणका काममा एकताको खाँचो औंल्याए । ‘हामी सबै कुनै न कुनै राजनीतिक पार्टीमा आस्था राख्छौं, विचारका लागि लडाई गर्छौ’, उनले भने, ‘तर त्यो लडाई चुनावमा मात्रै हुनुपर्छ, विकासमा होइन ।’

विकास अभियान अघि बढिसकेको बताउँदै मन्त्री बस्नेतले प्रदेश र स्थानीय तहको समन्वय र सहकार्यको आवश्यकतामा जोड दिए । सबैको एजेन्डा विकास र समृद्धि भएकाले जनताको अपेक्षा अनुसार काम गर्नुपर्नेमा उनको जोड छ । ‘अहिले हामी सबैको साझा चासो विकास र समृद्धि हो’, उनले भने, ‘केन्द्र, प्रदेश र स्थानीय तह सबैको ध्यान कसरी जनताको जीवनस्तर सुधार्न सकिन्छ भन्नेमै छ ।’

पहिले नेताको चाहना अनुसार योजना बन्ने गरेको भन्दै उनले अब जनताकै माग र भावना अनुसारका काम हुन थालेको बताए । खानेपानी, सडक, विद्यालय निर्माण जस्ता योजनालाई सरकारले प्राथमिकता दिएको उनको भनाइ छ । जिल्लाको उत्तरी क्षेत्रका जनताले भोगेका पीडा आफूले नजिकबाट महसुस गरेको भन्दै उनले उत्तरी गोरखाले अब काँचुली फेर्ने दावीसमेत गरे ।

कार्यक्रममा आरुघाट गाउँपालिकाका अध्यक्ष पूर्णबहादुर दाहाल, नेकपा जिल्ला संयन्त्र सदस्य कृष्ण नेपाली, स्वारा सघनका कार्यकारी निर्देशक सीताराम श्रेष्ठ लगायतले बोलेका थिए । २७ लाख २६ हजामा भवन निर्माण भएको संस्थाका आवास संयोजक रविन कट्टेलले बताए ।

धार्चे गाउँपालिका ७ स्थित लापुवेशी खानेपानी आयोजना निर्माण भएको छ । गण्डकी प्रदेश मातहतको खानेपानी तथा सरसफाइ डिभिजन कार्यालय गोरखा अन्तर्गत सञ्चालित उक्त योजना शनिबार मन्त्री बस्नेतले उद्घाटन गरे । ६५ लाख ८१ हजार लागतमा निर्माण भएको योजनाबाट ४१ घरधुरी लाभान्वित हुने इन्जिनियर देवबहादुर लामाले बताए ।