पोखरा ।
इशानेश्वर करापुटार पोखरा सम्पर्क समाजको आयोजनामा भएको रक्तदानमा ५९ युनिट रगत संकलन भएको छ ।
कार्यक्रममा समाजका संस्थापक अध्यक्ष ऋषिकेशव सुवेदीले समाजका सदस्यको हितका लागि काम गर्दै आएको समाजले रक्तदान आयोजना गरी मानवीय सेवा गरेको जनाए ।

नेपाल रेडक्रस सोसाइटी रक्तसंचार सेवा केन्द्र पोखराका प्रमुख अर्जुन ज्ञवालीले आगामी दिनमा पनि यस्ता कार्यक्रमलाई निरन्तरता दिन आग्रह गरे । डा. निरञ्जन कोइरालाले रक्तदानको महत्वबारे प्रकाश पारे । कार्यक्रम संयोजक एवं समाजका सहसचिव प्रल्हादचन्द्र घिमिरेले कार्यक्रममा कमलराज पन्तले ५१ औं पटक रक्तदान गरेको जानकारी दिए । समाजका अध्यक्ष बलराम घिमिरेको अध्यक्षतामा भएको कार्यक्रममा सचिव निर्मल सोतीले पनि बोलेका थिए ।