पोखरा ।
पृथ्वीराजमार्ग अन्तर्गत तनहुँको म्याग्दे गाउँपालिका ३ धयरेमा बिहीबार दिउँसो माइक्रो बस दुर्घटना भएको छ । दुर्घटनामा परि १४ जना घाइते भएको जिल्ला प्रहरी कार्यालय तनहुँले जनाएको छ । दमौलीबाट पोखरातर्फ जाँदै गरेको बा ४ख ९९९९ नम्बरको माइक्रो अनियन्त्रित भई सम्धीखोला पुलको रेलिङमा ठोक्किँदा बसमा सवार यात्रुहरु घाइते भएको प्रहरी नायब उपरीक्षक युवराज खड्काले बताए । रेलिङमा ठोक्किँदा माइक्रो १५ फिट तल खसेको प्रहरीले बताएको छ ।

घाइतेमध्ये सात महिला र सात पुरुष रहेका छन् । घाइतेमध्ये विमल रानाभाट, भानुप्रसाद भट्टराई, बिन्दु भट्टराई, भावना श्रेष्ठ र माइक्रो चालक जीवन आलेलाई थप उपचारका लागि पोखरास्थित मणिपाल शिक्षण अस्पताल पठाइएको छ । अन्य घाइतेको दमौलीस्थित रत्नहरि अस्पतालमा उपचार भइरहेको प्रहरीले बताएको छ ।