समाधान सम्वाददाता

कास्कीको अन्नपूर्ण गाउपालिकाले १० महिनाअघि गरेको निर्णय अलपत्र छ । अन्नपूर्ण आधार शिविरमा हेलिप्टरको व्यावसायिक उडान भर्न नदिने निर्णय गाउँ सभाले गरेको थियो । तर हेलिकप्टर उडान निरन्तर छ । उडान रोक्ने नाममा गाउ पालिकाले पत्राचार समेत गरेको छैन ।

अन्नपूर्ण आधार शिविरमा व्यावसायिक उडान भर्न नदिन गाउँ पालिकाका अध्यक्ष युवराज कुँवरले नै चासो देखाएका थिए । गाउँ परिषदमा उनैले प्रस्ताव लगेका हुन् । ‘हेलिकोप्टरको आवाजले संरक्षित क्षेत्रका वन्यजन्तु र चराचुरुंगी भागे,’ अध्यक्ष कुँवरले भनेका थिए, ‘त्यसैले उद्दार (रेस्क्यु) बाहेका उडान बन्द गर्ने निर्णय गरेका छौं ।’

निर्णय भएको १० महिनासम्म पनि कार्यान्वयनका लागि गाउँ पालिकाले कुनै चासो देखाएको छैन । अध्यक्षकैबेवास्ताका कारण निर्णय अलपत्र परेको सोही गाउँपालिकाका १ वडाध्यक्षले बताए । ‘कार्यविधि बनाएर निर्णय लागु गर्ने हो भन्नुहुन्थ्यो । तर कहिल्यै चासो दिनुभएन, खै भित्री चलखेल भयो कि !’ उनले हेलिकोप्टर कम्पनीहरुले आर्थिक प्रलोभनमा पारेको हुनसक्ने आशंका समेत गरे ।

गाउँपालिका अध्यक्ष कुँवरले निर्णय कार्यान्वयन गर्न कठिन भइरहेको स्वीकार्दै आगामी असार महिनाको गाउँ परिषदबाट कार्यविधि पास गरेर निर्णय कार्यान्वयनमा जाने बताए । ‘भिआइपी, अशक्त र विरामी उद्दारका लागि उडान भर्न दिने, व्यावसायिक उडान भर्न नदिने भनेको हो, अबको असारको गाउँ सभाले कार्याविधि बनाएर पास गर्छ,’ अध्यक्ष कुँवरले भने ।

अध्यक्ष कुँवरले यस बारेमा प्रदेश सरकारसँग समन्वयका लागि उद्योग, पर्यटन, वन तथा वातावरण मन्त्री विकास लम्सालसँग कुरा भइरहेको बताए ।