जोमसोम ।

म्याग्दी अन्नपूर्ण ३ दानाको एबिसी क्लबले मुस्ताङमा आयोजित खुला आर्चरी प्रतियोगिता जितेको छ । धौलागिरी युवा क्लब कोवाङले आयोजना गरेको प्रतियोगितामा आयोजकलाई हराउँदै एबिसी विजयी भएको हो । आयोजक धौलागिरीलाई एबिसीले ८ स्कोरले हराएको हो ।

म्याग्दी र मुस्ताङका ११ क्लबको सहभागिता रहेको प्रतियोगिता १५ डोरमा चलाइएको थियो । निर्धारित १५ डोरमा एबिसीले १ सय ४७ स्कोर बटुलेको थियो ।

यस्तै, मिलिजुली युवा क्लब मार्फाले १ सय ३६ स्कोर बनाउँदै तेस्रो स्थान हात पा¥यो । खेलमा ५० खोल भएको थियो । आर्चरी खेल अन्तर्गत गोलाकार फ्रेममा प्रहार गर्नेलाई (खोल) भनिन्छ । यसरी खोलमा प्रहार गर्ने खेलाडीलाई बेग्लै नगद पुरस्कार प्राप्त गर्छन् ।

च्याम्पियन बनेको एबिसीले नगद ५० हजारसहित शिल्ड, ट्रफी, मेडल र प्रमाणपत्र पायो । उपविजेता धौलागिरीले नगद ३० हजारसहित र तेस्रो स्थान हासिल गरेको मिलिजुली युवा क्लब मार्फाले नगद १० हजारसहित शिल्ड, मेडल, ट्रफी र प्रमाणपत्र प्राप्त गर्‍यो ।

प्रतियोगितामा धौलागिरी युवा क्लब कोवाङका बुद्धि बुढाथोकी सर्वोउत्कृष्ट खेलाडी घोषित भए । उनले नगद ३ हजारसहित मेडल, ट्रफी र प्रमाणपत्र हात पारे । प्रतियोगिताको समापन समारोहमा धौलागिरी युवा क्लब जापानका पूर्वअध्यक्ष अनिल भट्टचनलाई आयोजक धौलागिरीले सम्मान गरेको छ । यस्तै अन्नपूर्ण युवा क्लब ताक्लुङका आर्चरी खेलाडी बुद्ध शेरचनलाई विशेष सम्मान गरिएको छ ।

आर्चरी खेल हिमाली क्षेत्रको परम्परागत सांस्कृतिक खेलको रुपमा लिने गरिन्छ । घरेलु खेलकुद क्षेत्रको विकास तथा पर्यटन प्रवद्र्धन गर्ने उद्देश्यले प्रतियोगिता सञ्चालन हुँदै आएको छ ।