काठमाडौं ।
नेपाल र चीनबीच अन्तरसंसदीय सहयोगसम्बन्धी सम्झौता भएको छ । सोमबार काठमाडौं आइपुगेको चिनियाँ प्रतिनिधिमण्डल र नेपाली प्रतिनिधिमण्डलबीच सिंहदरबारमा भएको वार्तामा सहमति भएपछि सम्झौतामा हस्ताक्षर भएको हो । वार्तामा नेपाली प्रतिनिधिमण्डलको नेतृत्व सभामुख अग्नि सापकोटले गरेका थिए भने चिनियाँ प्रतिनिधिमण्डलको नेतृत्व चिनियाँ जनकंग्रेस स्थायी समितिका अध्यक्ष ली चान्शुले गरेका थिए । सम्झौतापत्रमा सभामुख सापकोटा र अध्यक्ष लीले हस्ताक्षर गरेका छन् ।

६ बुँदे सम्झौतापत्रमा दुई देशबीच आपसी सहयोग अभिवृद्धि गर्ने, अन्तरसंसदीय सम्बन्ध विस्तार गर्ने, उच्चस्तरीय भ्रमण आदानप्रदान गर्नेलगायतका विषय छ । चिनियाँ जनकंग्रेस स्थायी समितिका अध्यक्ष ली चार दिने भ्रमणका लागि सोमबार काठमाडौं आएका छन् ।

६७ सदस्यीय प्रतिनिधिमण्डलको नेतृत्व गर्दै काठमाडौंका आएका उनले राष्ट्रपति विद्यादेवी भण्डारी, प्रधानमन्त्री शेरबहादुर देउवा, नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डसँग भेटवार्ता गर्ने कार्यक्रम छ ।