पोखरा ।
पोखराको पर्यटकीय क्षेत्र महेन्द्र गुफादेखि केआई सिंह पुलसम्म नालासहितको फुट ट्रयाक निर्माण हुने भएको छ । गण्डकी प्रदेश सरकारले विनियोजन गरेको रकमबाट सडकको दुवै भागमा नालासहितको फुट ट्रयाक र साइकल लेन निर्माण हुने भएको हो ।

बुधबार प्रदेश सरकारका भौतिक पूर्वाधार, सहरी विकास तथा यातायात व्यवस्था मन्त्री कुमार खड्काले यसको सुरुआत गरे । मन्त्री खड्काले कास्कीको उत्तरी भेगको समग्र विकासका लागि प्रदेश सरकार प्रतिबद्ध रहेको बताए । उनले निर्धारित समयमा नै काम सम्पन्न गर्न ठेकेदार कम्पनीलाई निर्देशन दिए ।

पूर्वाधार कार्यालय कास्की प्रमुख डा महेन्द्र बानियाँले फुट ट्रयाक निर्माण पछि यस क्षेत्रको मुहार फेरिने विश्वास व्यक्त गरे । वडा नम्बर १६ का कार्यवाहक अध्यक्ष रामचन्द्र आचार्यको अध्यक्षतामा भएको कार्यक्रममा गुफा अभियन्ता गोविन्दबहादुर बस्नेत, निर्माण व्यवसायी बलबहादुर राना, यमबहादुर कार्की लगायतले बोलेका थिए ।

आगामी २ वर्षभित्र निर्माण सक्ने गरी सिम्रन कन्स्ट्रक्सनले ११ लाख ९० हजारमा कामको जिम्मा पाएको छ ।