काठमाडौं ।
नेकपा एमालेले मंसिरमा हुने प्रतिनिधि सभा र प्रदेश सभा सदस्यको निर्वाचन अन्तर्गत समानुपातिकतर्फका उम्मेदवार आइतबार टुंगो लगाउने भएको छ । शनिबार अध्यक्ष केपी ओली निवास बालकोटमा बसेको सचिवालय बैठकमा महासचिव शंकर पोखरेलले समानुपातिक सूचीमा राख्ने नामबारे सामान्य जनाकारी गराएका थिए ।

एमाले उपमहासचिवसमेत रहेका प्रचार विभाग प्रमुख पृथ्वीसुब्बा गुरुङले समानुपातिक सूचीबारे कानुनी प्रक्रिया र संख्याबारे सामान्य जानकारी गराएको र आइतबार बस्ने बैठकमार्फत टुंगोमा पुग्ने जानकारी दिए । ‘आजको बैठकमा महासचिवले प्रतिनिधि सभामा सिफारिस गर्नुपर्ने १ सय १० नामको कानुनी प्रक्रिया र सयाबारे जानकारी गराउनुभयो’, गुरुङले भने, ‘सात वटा प्रदेशमा सिफारिस गर्नुपर्ने २ सय २० जना सदस्यको क्लस्टरवाइजका बारेमा पनि बैठकलाई जानकारी गराउनुभयो ।’

बैठकले अछाम, दार्चुला लगायतका जिल्लामा वर्षाका कारण भएको जनधनको क्षतिप्रति दुख प्रकट गर्दै पीडामा परेकाहरूलाई उद्धार र राहतको व्यवस्था गर्न सरकारको ध्यानाकर्षण गराएको नेता गुरुङको भनाइ छ ।