पाेखरा ।

आफ्नै पार्टी नेतृत्वकाे सत्ता गठबन्धनका विरुद्ध विद्राेह गर्ने निर्णय गरेका नेपाली कांग्रेसका पुराना नेता महादेव गुरुङले विपीकाे आदर्श र भनाईलाई मनन गरेर यस्ताे निष्कर्षमा पुगेकाे बताएका छन् ।

गुरुङले कास्की जिल्ला निर्बाचन क्षेत्र नम्बर २ बाट उमेद्वारी दिने भएका हुन् । याे निर्बाचन क्षेत्र सत्ता गठबन्धनकाे भागबण्डामा नेकपा एकिकृत समाजवादीकाे भागमा परेकाे छ । सत्ता गठबन्धनबाट नेकपा एसका श्रीनाथ बरालले टिकट पाएका छन् ।

के तपाईले पार्टी नेतृत्वकाे निर्णय विरुद्ध विद्राेह गर्दै हुनुहुन्छ भन्ने समाधानकाे प्रश्नमा उनले भने– हाे मैले विद्राेह गर्दै छु, मुलुक बचाउनका लागि मैलै चुनाव लड्नै पर्ने भयाे ।

यस्ताे निर्णय लिनु अघि आफूले विपीलाई सम्झेकाे बताउदै गुरुङले भने– विपीले भन्नु भएकाे सम्झे, जब मुलुक संकटमा पर्छ त्याे बेला मुठी माटाे हातमा लिएर त्याे माटाेलाई साेध, माटाेले जे भन्छ त्यही गर । मैले यसै गरे र माटाेले मलाई निर्बाचन लड्न आदेश दियाे । मेराे उमेद्वारी मुलुक जाेगाउन र हिन्दु राज्य पुनस्थापना गर्नका लागि हाे ।