पोखरा ।
गण्डकी प्रदेशमा जारी नवौं राष्ट्रिय खेलकुद प्रतियोगिता अन्तर्गत शनिबार पोखरामा भएको साइक्लिङको डाउनहिल विधामा पुरुष र महिलात दुवैतर्फ नेपाल आर्मीका खेलाडी विजेता बनेका छन् । पुरुषतर्फ नेपाल आर्मीका राजेश मगरले १४ सय मिटरको डाउनहिल १ मिनेट ४९‍.१० सेकेन्डमा पूरा गर्दै स्वर्ण पदक जितेका छन् ।

बागमती प्रदेशका निरभ श्रेष्ठले १ मिनेट ५२.१० सेकेन्डमा दूरी पूरा गर्दै रजत र एपिएफका प्रचित थापा मगरले १ मिनेट ५५.६९ सेकेन्डमा उक्त दूरी पार गरी कास्य पदक जिते । यता, महिलातर्फ पनि सोही दूरी नेपाल आर्मीकी निस्मा श्रेष्ठले २ मिनेट २३.५८ सेकेन्डमा पार गरेर स्वर्ण पदक पाइन् । रजत पदक पनि नेपाल आर्मीकै उसा खनालले जितिन् । खनालले २ मिनेट ३७.४५ सेकेन्डमा दूरी पूरा गरिन् । त्यस्तै २ मिनेट ४०.०९ सेकेन्डमा दूरी पूरा गर्दै गण्डकी प्रदेशकी जमुना थापाले कास्य पदक पाइन् ।

शनिबार भएको साइक्लिङको डाउनहिल विधामा नेपाल आर्मीले २ स्वर्ण, बागमती प्रदेश र नेपाल आर्मीले समान १ रजत, गण्डकी प्रदेश र एफिएफले १/१ कास्य पदक जित्न सफल भए । ७ प्रदेश र ३ विभागीय गरी १० क्षेत्रबाट प्रतिस्पर्धा रहने साइक्लिङमा डाउन हिल, क्रस कन्ट्री, रोड रेस इन्डीभिजुअल टाइम ट्रायल र रोड रेस मास स्टार्ट विधा छन् । आइतबार पोखराको ड्यामसाइड नजिक रानीवनको ट्रयाकमा क्रस कन्ट्री विधामा प्रतिस्पर्धा हुँदै छ ।