पोखरा ।
कास्की २ बाट प्रतिनिधिसभा सदस्य उम्मेदवार बनेका माधवप्रसाद कँडेलले गुणस्तरीय शिक्षाका लागि शिक्षा ऐन परिवर्तन गर्न आवश्यक रहेको बताएका छन् ।

राष्ट्रिय स्वतन्त्र पार्टी (रास्वपा) बाट प्रतिनिधि सभा सदस्य उम्मेदवार बनेका कँडेलले आफ्नो मुख्य योजना शिक्षामा आमूल परिर्वतन गराउने रहेको सुनाए ।

नेपालको सामुदायिक विद्यालयको शैक्षिक गुणस्तर निकै कमजोर रहेको र यसका लागि शिक्षा ऐनमा सुधार गर्न अत्यावश्यक रहेको उनले बताएका छन् । मतदातासँगको भेटघाटको क्रममा उनले हरेक क्षेत्रको परिवर्तनका लागि पहिलो खुड्किलो भनेकै शैक्षिक क्षेत्र रहेको उनले बताए ।

‘यहाँ निजी विद्यालयले पूरै देश ढाकेको छ । त्यहाँ गरिब तथा विपन्न परिवारले पढाउन सक्दैनन् । भएका सार्वजानिक विद्यालयको शैक्षिक स्तर निकै दयनीय छ,’ उनले भने, ‘मेरो योजना भनेको शिक्षाको क्षेत्रमा परिवर्तन गर्ने हो । सबै शिक्षित भएमा देश समृद्ध बन्छ, विकास हुन्छ ।’

कँडेलले सामुदायिक विद्यालयको कक्षा १२ सम्म निःशुल्क पढाउने वातावरण सिर्जना गर्न आवश्यक रहेकोमा जोड दिए ।