पोखरा ।
नेकपा एमाले केन्द्रीय सदस्य एवं कास्की निर्वाचन क्षेत्र नं. २ का उम्मेदवार विद्या भट्टराई अधिकारीले विकास, नर्माणको निरन्तरताका लागि आफ्नो उम्मेदवारी भएको बताएकी छन् । ज्येष्ठ नागरिकलाई मासिक ५ हजार सामाजिक सुरक्षा भत्ता दिने घोषणा गरे पनि बीचमै सरकार ढलेपछि अवरोध भएको बताउँदै उनले मंसिर ४ गतेपछिको बन्ने एमालेको सरकारले सबै खाले भत्तामा वृद्धि गर्ने आश्वासन दिइन् ।

पोखरा १६ स्थित पर्यटकीय स्थल अर्मलाकोटमा भएको घरदैलो कार्यक्रममा उनले यस क्षेत्रको पर्यटन प्रवद्र्धनका लागि आवश्यक पूर्वाधार निर्माणमा जुट्ने प्रतिवद्धता गरिन् ।
दुःखको अवस्थामा उपनिर्वाचनमा यस क्षेत्रका मतदाताले विजयी गराएको स्मरण गर्दै उनले सडक, शिक्षा, स्वास्थ्य, पर्यटन पूर्वाधार निर्माणका अधुरा काम पूरा गर्नका लागि पुनः उम्मेदवार बनेको स्पष्ट पारिन् ।

कास्की २ (२)की उम्मेदवार मीना गुरुङले ऐतिहासिक एवं पर्यटकीय क्षेत्र अर्मलाकोटमा सांस्कृतिक ग्राम निर्माण गर्ने प्रतिवद्धता जनाइन् । गण्डकी प्रदेश सभामा समानुपातिक सांसदको भूमिका निर्वाह गरिसकेकी उनले यस क्षेत्रको अधुरा विकास निर्माणका काम पूरा गर्न प्रत्यक्ष उम्मेदवारका रुपमा उपस्थित भएको जनाइन् ।

कर्णबहादुर गुरुङको अध्यक्षतामा भएको कार्यक्रममा नेकपा एमाले कास्कीका कार्यवाहक अध्यक्ष तेजनारायण अधिकारी, खेलप्रेमी तेजबहादुर गुरुङ, एमाले १६ का अध्यक्ष राजेन्द्र गुरुङ, निवर्तमान वडाध्यक्ष जीवन आचार्य, यमनकाजी गुरुङ लगायतले बोलेका थिए ।
प्रतिनिधि सभा सदस्य उम्मेदवार भट्टराईले बुधबारै पोखरा १५ स्थित ढुंगेसाँघुमा पनि घरदैलो गरेकी छन् ।