पोखरा ।
कास्की २ मा गठबन्धनको तर्फबाट प्रदेशसभा २ (२) का उम्मेदवार विन्दुकुमार थापाले आफूले सुरु गरेका काम पूरा गर्न पुनः सोही क्षेत्रबाट उठेको बताएका छन् ।

पोखरा २० भलाममा पाँच दलीय गठबन्धनले आयोजना गरेको चुनावी अभियानमा थापाले यो क्षेत्रमा धेरै योजना र कार्यक्रम सुरु गरेकाले त्यसलाई पूरा गर्ने दायित्व निर्वाह गर्न फेरि मैदानमा आएको सुनाए ।

‘पहिला तपाईहरुले जिताउनुभएको हो । पहिलो कार्यकालमा धेरै विकास निर्माणका काम सुरु भएका छन्,’ उनले भने, ‘अब केही नयाँ काम गर्नुपर्नेछ अनि पुराना योजना पूरा गर्नपर्नेछ ।’

स्थानीयले बाटो, खानेपानी र विकास निर्माणको समस्या हल गरिदिन उनीसँग आग्रह गरेका थिए । स्थानीय शेषकान्त शर्माले बाटोका लागि केन्द्रीय योजनामा पर्न नसकेको गुनासो गरे ।