पोखरा ।
नेकपा एमाले कास्की ३ का उम्मेदवारहरुले शनिबार पोखरा २३ का विभिन्न स्थानमा घरदैलो गरी मत मागे । उनीहरुले देशको समृद्धिको खाका, योजना र इच्छाशक्ति एमालेसँग मात्र भएकाले एमालेको जित सुनिश्चित भएको दाबी गरे ।

प्रतिनिधि सभा सदस्य उम्मेदवार दामोदर बैरागी र प्रदेश सभा सदस्यका उम्मेदवार राजीव पहारीले परिवर्तनको चाडै आभास पाउन जनताले एमालेलाई नै छान्ने उल्लेख गरे । घरदैलोमा स्थानीयले एमाले नेतृत्वको प्रदेश र संघ सरकार हुँदा ऐतिहासिक काम र तीव्र विकास भएकाले आफूहरुले एमाले उम्मेदवारलाई नै जिताउने बताएका थिए ।

निवर्तमान सांसदसमेत रहेका पहारीले ३० वर्षदेखि पुल बनाउने सपना एमाले सरकारको पालामा साकार पारेको स्मरण गरे । घाँटिछिना, ठूलाखेतका स्थानीयले बस्ती संरक्षणका लागि पहारीको नेतृत्वमा धेरै काम भएको स्मरण गरे ।

शनिबार उम्मेदवार बैरागी र पहारी वडा नम्बर २३ स्थित असलचौर, लोखलढुंगा बाम्दी, निर्माने, खोरपाखा, चैनपुर, बाम्दी लगायतका स्थानमा पुग्दा त्यहाँका आमा समूह, युवा समूह लगायतले स्वागत गरेका थिए ।

यसअघि उम्मेदवारद्वयले शुक्रबार पोखरा–२४ स्थित कास्कीकोट, पामे, लौरुक, कार्कीको तहरा, खोरियापानी, गैह्रावारी, मौला,पाटेस्वाँरा, लौसिवोट, खड्गाउँ लगायका स्थानमा घरदैलो गरेका थिए ।