मैले एक कार्यकाल गण्डकी प्रदेश सभा सदस्यका रुपमा काम गरिसकेको छु । यस कारण प्रदेश सभाबारे जानकारी र त्यहाँ काम गर्ने शैलीबारे मलाई अनुभव छ । यस अनुभवलाई मैले फेरि तिखारेर अबको ५ वर्ष फेरि प्रदेश सभामै काम गर्न चाहन्छु ।

म प्रदेश सरकारको कानुन मन्त्री पनि बनें । मन्त्री बनेर जनताका सेवाका लागि कानुन निर्माणदेखि जनताका आधारभूत समस्या के के छन् भन्ने पनि बुझेको छु । ती समस्या निराकरणका लागि पनि फेरि प्रदेश सभामै उठेको हुँ ।

जनतामाझ म भिजेको नेता पनि हुँ, जनतामा म परिचित अनुहार हुँ । जनताका लागि के गर्दा ठीक हुन्छ भन्ने थाहा छ । गण्डकी प्रदेश सभाको नामाकरण र राजधानी निर्धारण गर्न बनेको समिति सभापतिका रुपमा पनि काम गरें । मैले प्रदेश सभाबाट सांसद हुँदा र सरकारमा सहभागी भएपछि पाउने सेवा सुविधा आफ्ना लागि प्रयोग गरेको छैन ।

सबै सेवा, सुविधा जनताकै लागि पठाएको छु । जनताका लागि एक कार्यकाल काम गरिसकेको मैले कसैलाई पनि चित्त नदुख्ने गरी काम गरेको छु । यसरी नै काम गर्ने मेरो लक्ष्य हुनेछ । जनतामाझ घरदैलेमा पुग्दा जनतामा मेरो उम्मेदवारीले उत्साह जागेको पनि देखेको छु ।

उहाँहरु असाध्यै खुसी हुनुहुन्छ र मेरो कामको मूल्यांकन पनि सही ढंगले गर्नुभएको छ । उहाँहरुकै सेवाका लागि यसपाली मेरो उम्मेदवारी हो । निर्वाचित भएको खण्डमा अविचलित रुपमा म अहोरात्र खटिनेमा कटिबद्ध छु ।