पोखरा ।
स्टेप बाइ स्टेप मावि मासवारले बिहीबार नमुना निर्वाचन गराएको छ । कक्षा ८, ९ र १० का विद्यार्थीको सहभागितामा नमुना निर्वाचन विद्यालय प्रांगणमा गराइएको थियो । विद्यार्थीलाई निर्वाचनबारे विविध पक्षमा जानकारी गराउन निर्वाचन भएको हो ।

नमुना निर्वाचनमा विद्यार्थी नै मतदान अधिकृत, कर्मचारी, प्रहरी र मतदाताको भूमिकामा थिए । प्रतिनिधि सभा र प्रदेश सभाको प्रत्यक्ष र समानुपातिक छुट्टै छुट्टै मतपत्र र मतपेटिकामा मतदाता विद्यार्थीले भोट खसालेका थिए । पहिलो मतपत्र संघीय संसदको प्रत्यक्ष, दोस्रो संघीय संसदको समानुपातिक, तेस्रो प्रदेश सभा सदस्यको प्रत्यक्ष र चौथो प्रदेश सभा सदस्य समानुपातिक गरी क्रमशः मतपत्र वितरण गरी विद्यार्थीले क्रमश मतपेटिकामा मत खसालेका थिए ।

विद्यालयका सहप्राचार्य दीपक गिरीले उमेरको कारण मंसिर ४ गते हुने निर्वाचनमा मतदान गर्न नपाए पनि विद्यार्थी प्रत्यक्ष निर्वाचनमा सहभागि बनेर निर्वाचन प्रक्रियासम्बन्धी सम्पूर्ण कुराहरु सिक्ने अवसर पाएको बताए । सामाजिक विभाग प्रमुख लक्ष्मण भण्डारीले संयोजन गरेको कार्यक्रममा कक्षा १० की छात्रा रोशनी पाठक मतदान अधिकृत थिइन् ।