दलहरु भोट चाहन्छन्, मतदाता युवा र परिवर्तन । पुराना दलहरुले न परिवर्तन दिन सके, न त युवालाई अवसर । सधै पद र पैसाको पछि पुराना राजनीति दल लागे । ¥याल चुहिने बेलासम्म आफूले नै ठाउँ ओगटिरहे । जनताका बारेमा न त केही सोचे, न त विकासको बारेमा, मात्र सोचे कुर्सीमा कसरी टिकिरहने ।

कुनै समय थियो– नेपाली राजनीतिमा पुराना पार्टीका दबदबा । त्यति बेला न स्वतन्त्रको सम्भावना थियो न त नयाँ वैकल्पिक शक्तिको । ठूला दलबाट उम्मेदवार बन्न नेताहरु मरिहत्ते गर्थे, मतदाता पनि उम्मेदवार चिन्दैनथे, चिन्ह हेरेर भोट गर्थे ।

ठूला दल मतदाता असन्तुष्ट हुँदा पनि भोट ठूला दललाई भोट दिन्थे किनभने मतदातासँग अन्य विकल्प हुँदैनथे । स्वतन्त्र उठ्ने उम्मेदवारप्रति पनि मतदाताले विश्वास गर्न सकेनन् । जसले पनि पुराना पार्टीको दबदबालाई थप बल पुग्यो । पुराना पार्टीप्रति मतदाताको वितृष्णा बढेप नि मतदानमा परिणत गर्न सकेका थिएनन् । बललिन चाहेका मतदाताले मत बदल्न सकेका थिएनन् ।

तर गत वैशाखको स्थानीय तहको निर्वाचनपछि भने केही ठाउँमा मतदाताले पुराना दलहरुप्रतिको वितृष्णा मतदानमै देखाइदिए । मतदाताले पार्टी, चिन्हभन्दा पनि उम्मेदवार र एजेन्डालाई हेरेर भोट गरे । त्यसको प्रभाव ६ महिनापछि भएको प्रदेश सभा तथा प्रतिनिधि सभा निर्वाचनमा पनि देखियो ।

चुनाव लड्न पार्टी, चुनाव जित्न चिन्ह चाहिन्छ भन्ने मान्यताबाट पार्टी तथा उम्मेदवार माथि उठेको देखियो । पार्टीमा टिकट नपाएकाहरुले पनि पार्टीबाट विद्रोह गरेर स्वतन्त्र उम्मेदवारी दिए ।

प्रचारप्रसारका क्रममा पनि पुराना पार्टी तथा ठूला भनिने पार्टीप्रतिको मतदाताको असन्तुष्टि छताछुल्ल देखिन्थ्यो । जुन मतदानमा पनि देखिएको छ । देशभरका धेरैजसो क्षेत्र मतगणना जारी छ । जसमा वैकल्पिक नयाँ राजनीतिक दल र स्वतन्त्र उम्मेदवारलाई आशा जगाउने मत पाएका छन् ।

वैकल्पिक नयाँ राजनीतिक दल र स्वतन्त्र उम्मेदवारले सुरुवाती अवस्थामा अनपेक्षित मत पाएको देखिन्छ । जुन न राजनीतिक दलले सोचेको थिए, न स्वयम् उम्मेदवारले । यसबाट मतदाता पुराना दल र नेताबाट छुटकारा चाहेको प्रकट्टै देख्न सकिन्छ ।

मतदाता उम्मेदवार र एजेन्डा हेरेर भोट खसान्न सचेत बन्न थालेका छन् । सधै जसो नै झुटा आश्वासन दिएर चुनावमा मात्र गाउँ पस्ने उम्मेदवारप्रति मतदाता सचेत देखिन्छन् । जुन सुरुवाती मत परिणामले देखाएको छ । पुराना दलको सिन्डिकेट अब अन्त्य हुने देखिन्छ । अब पुराना तथा ठूला भनिने दलहरु सचेत हुन जरुरी छ । अन्यथा उनीहरुले राजनीतिमा ठूलो क्षति व्यहोर्न तयार हुनुपर्छ ।