पोखरा ।
कास्की निर्वाचन क्षेत्र नं. २ प्रतिनिधि सभा सदस्यमा निर्वाचित एमाले नेतृ विद्या भट्टराई अधिकारी बिहीबार पोखरा १८ जामुनाबोटमा पुगेर रवीन्द्र अधिकारीको शालिकमा माल्यार्पण गरिन् ।

४ गते भएको प्रतिनिधि सभा र प्रदेश सभा सदस्यको निर्वाचनमा विजयी भएसँगै उनी जामुनाबोटस्थित राष्ट्रिय विभूति तथा सहिद पार्कमा पुगेर पति रवीन्द्रको पूर्णकदको शालिकमा माल्यार्पण गरेकी हुन् ।

२०७६ साल फागुनमा तत्कालीन संस्कृति, पर्यटन तथा नागरिक उड्डयन मन्त्री रवीन्द्रको हेलिकप्टर दुर्घटनामा परी निधन भएपछि भएको उपनिर्वाचनमा विजयी भट्टराई दोस्रो पटक प्रतिनिधि सभा सदस्य पदमा निर्वाचिन बनेकी हुन् ।

सो अवसरमा निर्वाचन क्षेत्र २(१) बाट निर्वाचित प्रदेश सभा सदस्य भीमबहादुर कार्की लगायत एमालेका नेता तथा कार्यकर्ताले पनि रवीन्द्रको शालिकमा पुष्पार्पण गरेका थिए ।

उनीहरुले पोखरा १६ बाटुलेचौरस्थित मदन भण्डारी र जीवराज आश्रितको अर्धकदको शालिक, महेन्द्रपुलमा रहेको जनआन्दोलनका सहिद भीमसेन दाहाल, मुस्ताङचोक स्थित कम्युनिस्ट नेता चित्रबहादुर गुरुङ, पोखरा ७ राष्ट्रबैंक चोक स्थित सहिद झपिन्द्र कार्कीको शालिकमा माल्यार्पण गरेका छन् ।