पोखरा ।
भर्खरै सम्पन्न आम निर्वाचनमा अपेक्षित परिणाम ल्याएन नसकेको प्रतिपक्षी दल नेकपा (एमाले) नयाँ सरकार गठनका लागि पहल नगर्ने भएको छ । सरकार गठनको प्राथमिकता पाँच दलीय गठबन्धनले पाउने एमाले महासचिव शंकर पोखरेलले बताए ।

प्रेस चौतारी नेपाल कास्की शाखाले बुधबार आयोजना गरेको पत्रकार भेटघाटमा एमालेले सरकार गठनको म्यान्डेट नपाएको उल्लेख गरे । ‘आम निर्वाचनमा एमालेले सरकार गठनको म्यान्डेट पाएको छैन ।

सरकार गठन हाम्रो प्राथमिकता होइन,’ महासचिव पोखरेलले भने, ‘हामी पर्ख र हेरको अवस्थामा छौं । त्यसैले हामी सरकार गठनको लागि पहल गर्दैनौ ।’

कम्युनिस्ट पार्टीबीच ध्रुवीकरण गरी बहुमत पुर्‍याउने आधार नभएको उल्लेख गर्दै उनले स्वार्थका लागि सत्तामा जान एमाले तयार नभएको जनाए । उनले माओवादी केन्द्र लगायतका कम्युनिस्ट पार्टीहरु नीतिगत रुपमा राजनीतिक ध्रुवीकरणभन्दा पनि सत्ता स्वार्थमा केन्द्रीत रहेको आरोप लगाए ।

नेपाली कांग्रेसले नीतिगत रुपमा पंँजीवादी शक्तिलाई ध्रुवीकरण गरी विकल्प दिन नसकेको उनले उल्लेख गरे । उनले आफ्नो नीतिगत नेतृत्वमा शासन गर्ने सामर्थ कांग्रेससँग नभएको दाबी गरे ।

सहरिया मध्यम वर्गलाई राष्ट्रिय पार्टीबाट अलग गर्ने मिसन, सनातन हिन्दुू राज्यको पक्षमा राप्रपाको धर्म राजनीतिक धर्मको प्रयोग दुबै प्रवृत्ति हानिकारक र चुनौतीपूर्ण रहेको उल्लेख गर्दै उनले क्षेत्रीय पार्टीलाई विकर्षण गरी नयाँ क्षेत्रीय पार्टी खडा गरेर राष्ट्रिय पार्टी कमजोर बनाउन खेल गलत भएको टिप्पणी गरे ।

राष्ट्रिय स्वतन्त्र पार्टी, जनमत पार्टी र नागरिक उन्मुक्ति पार्टीको प्रभाव बढ्नु नेपालको राजनीतिका लागि चुनौतीको विषय भएको दाबी गर्दै उनले त्यसले पार्ने प्रभावको असरको विषयमा विवेचना गर्नु जरुरी भएको औंल्याए ।

राष्ट्रिय पार्टीहरू असफल भए भन्ने सन्देश दिन खोजिएको अवस्थामा मुलुकका ठूला २ दल एमाले र काँग्रेस मिलेर गएर राजनीतिक स्थिरता दिन सकिने चर्चा गर्दै महासचिव पोखरेलले कांग्रेस एमाले मिलेर चुनौतीको सामना गर्न कांग्रेस तयार नभएको उल्लेख गरे । ‘नीति, विचार र एजेन्डा विहीन गठबन्धनले मुलुक संकटको समाधान गर्न सक्दैन ।

गठबन्धनसँग विश्वास छैन । एमालेसँग चाहिने जनादेश छैन,’ महासचिव पोखरेलले भने, ‘राष्ट्रिय पार्टीहरू मिलेर संकट समाधान गर्नुपर्नेमा कांग्रेसको सत्ता स्वार्थका कारण सम्भव भएन । राजनीतिक अस्थिरताको जोखिम झन बढेको छ ।’

उनले प्रतिनिधि सभाका १ सय ५० सिट भएको सत्ता गठबन्धन अहिलेको आम निर्वाचनमा १ सय ३६ मा खुम्चिएर झन कमजोर भएको टिप्पणी गरे । कांग्रेस विरूद्ध एमाले माओवादी उभिँदा काँग्रेस गत निर्वाचन २३ सिटमा खुम्चिएको उल्लेख गर्दै उनले एमाले विरूद्ध ५ दलीय गठबन्धन हुँदा प्रत्यक्षमै कांग्रेसभन्दा दोब्बर ४४ सिट जितेको बताए ।

उनले सरकार बनाउन बहुमत पुर्‍याउन अध्यादेश ल्याउनु सदा, सर्वदा गलत भएको टिप्पणी गरे । जनादेशबाट नयाँ संसद बनिसकेको अवस्थामा नयाँ सरकारलाई जिम्मेवारी दिनुपर्ने उल्लेख गर्दै उनले राष्ट्रिय समस्याको जिम्मेवारी नयाँ संसद र त्यसले गठन गर्ने सरकारको भएकाले काम चलाउ सरकारको स्वार्थको विषयले राजनीतिक नैतिकतामामाथि प्रश्न उठेको जनाए ।