पोखरा ।
सहारा क्लब पोखराले आहा रारा पोखरा गोल्डकपको पुरस्कार बढाएको छ । राष्ट्रिय तथा अन्तर्राष्ट्रिय अन्तर क्लब आमन्त्रित आहा रारा पोखरा गोल्ड कप फुटबल प्रतियोगिताको २२ औं संस्करण पुस १२ देखि २३ गतेसम्म हुँदै छ ।

प्रथम पुरस्कारमा २ लाख थप गरी १२ लाख बनाइएको छ । द्वितीय पुरस्कारमा १ लाख थप गरी ६ लाख कायम गरिएको छ । २०५८ मा भएको क्याराभान गोल्ड कप गणना गर्दै २२ औं संस्करणबाट नामांकित यस प्रतियोगितामा बचत हुन आएको रकम क्लबबाट सञ्चालित सूर्यबहादुर केसी स्मृति सहारा फुटबल एकेडेमीमा खर्च गरिनेछ । हाल तेस्रो ब्याचको एकेडेमीमा १० जिल्लाका १३ बालक एकेडेमीमा छन् ।

यसैबीच प्रतियोगितामा सहभागी हुने १० टिमको टुंगो लागेको छ । नेपाल एपिएफ क्लब, मनाङ मस्र्याङ्दी क्लब, नेपाल प्रहरी फुटबल क्लब, त्रिभुवन आर्मी फुटबल क्लब र मछिन्द्र क्लबमा सहभागी हुँदै छन् ।

संकटा क्लब, चर्च ब्वाइज युनाइटेड फुटबल क्लब, बिवाइएससी एमएन युएसए, धरान फुटबल क्लब र आयोजक सहारा क्लब पोखराको टिम प्रतियोगिता सहभागी हुने सहाराका महासचिव रामजीप्रसाद अधिकारीले जानकारी दिए ।

यस प्रतियोगितालाई पहिलो संस्करणदेखि नै मुख्य प्रायोजन हिमश्री फुड्स प्रालिको उत्पादन आहा तथा रारा तयारी चाउचाउले गर्दै आएको छ । उत्कृष्ट पाँच विधाको पुरस्कार सूर्यबहादुर केसीको स्मृतिमा प्रदान गरिनेछ । प्रतियोगितामा १ करोड ५९ लाख ५० हजार रुपैयाँ आम्दानी खर्च १ करोड १३ लाख ५६ हजार हुने अनुमान छ ।