पोखरा ।
गण्डकी प्रदेश नीति तथा योजना आयोग उपाध्यक्षमा डा. गिरिधारी शर्मा पौडेल नियुक्त भएका छन् । प्रदेश मन्त्रिपरिषद्को आइतबार बिहान बसेको बैठकले आयोग उपाध्यक्षमा स्याङ्जाका पौडेललाई नियुक्त गर्ने निर्णय गरेको सरकारका प्रवक्ता आन्तरिक मामिला तथा कानुन मन्त्री रोशनबहादुर गाहामगरले जानकारी दिए ।

स्याङ्जाको आँधीखोला गाउँपालिका कमेरे स्थायी ठेगाना भएका पौडेलसँग युएनडिपीसहित अन्तर्राष्ट्रिय दातृ संस्थाहरुमा काम गरेको लामो अनुभव छ । राष्ट्रिय योजना आयोगमा समेत उनले परामर्शदाताका रुपमा काम गरिसकेका छन् ।

काठमाडौं रहेका पौडेलले मुख्यमन्त्रीसँग नियुक्तिको बारेमा कुरा फाइनल भइसकेको र हाल युएनडिपीमा कार्यरत रहेकाले त्यहाँ राजीनामा स्वीकृत भइसकेपछि मात्र सपथ लिने तयारी भएको बताए । उनले राजीनामा युएनडिपीको मुख्यालयमा पठाइसकेका छन् ।

पौडेल संस्थापक मुख्यमन्त्री पृथ्वीसुब्बा गुरुङका पालामा समेत आयोगको उपाध्यक्ष थिए । २०७५ साउन ६ गते उनलाई तत्कालीन मुख्यमन्त्री गुरुङ नेतृत्वको सरकारले गण्डकीको नीति तथा योजना आयोगको उपाध्यक्ष नियुक्त गरेको थियो ।

संघीयता कार्यान्वयनको सुरुसँगै विविध चुनौतीबीच गण्डकीमा डा. पौडेलले काम सुरु गरेका थिए । प्रदेशको स्थितिपत्र बनाउनेदेखि प्रथम पञ्चवर्षीय योजना उनकै पहलमा तयार भएको हो । हाल उक्त पञ्चवर्षीय योजनाको मध्यावधि समीक्षासमेत भइसकेको छ ।

६३ वर्षीय पौडेल योजना र विकास क्षेत्रका विज्ञ हुन् । पौडेलले युएनडिपीमा पाँच वर्ष काम गरे । उनी एनडिपीका तर्फबाट राष्ट्रिय योजना आयोगमा खटिएका थिए । पौडेलले बैंककबाट एमएस्सी र पीएचडी गरेका छन् । उनले थाइल्यान्डको एसियन इन्स्टिच्युट अफ टेक्नोलोजीबाट डेभलपमेन्ट प्लानिङ अध्ययन गरेका छन् ।

पहिलो कार्यकालमा आधार स्तम्भ खडा गरेको आयोगका नवनियुक्त उपाध्यक्ष पौडेलले बताए । प्रदेशको अस्तित्व बनाउनेदेखि धेरै पूर्वाधारका काम गर्न सफल भएको उपाध्यक्ष पौडलले दाबी गरे । ‘सुरुको कार्यकाल त आधारस्तम्भ खडा गर्ने बेला थियो ।

बेस केही पनि थिएन, कार्यविधि बनाउने, प्लानहरु बनाउनेदेखि प्रदेश नै कहाँ थियो कुन स्थान छ भन्ने थाहा थिएन, त्योदेखि धेरै पूर्वाधारका काम गरेको हो त्यो कार्यकालमा,’ उनले भने । प्रदेशलाई समृद्धि र सुखका लक्ष्य भेट्ने गरी योजना बनाएर अगाडि बढ्ने उपाध्यक्ष पौडेल प्रतिबद्धता गरे । ‘अबको कार्यकालमा गण्डकीका समृद्धि र सुखका लक्ष्य भेट्नेचाहिँ लक्ष्य राखेर तयार भएका छन् हाम्रा प्लानहरु,’ उनले भने ।

बैठकले सदस्य पनि चयन गरेको छ । तनहुँका कास्कीकी डा शान्ताकुमारी खत्री र तनहुँका डा. सुवास अधिकारीलाई सदस्य नियुक्त गरिएको मन्त्री गाहामगरले बताए । सदस्यमा नियुक्त भएका तनहुँका डा. अधिकारी कृष्णचन्द्र नेपाली पोखरेल नेतृत्वको सरकारका पालामा पनि आयोगका सदस्य थिए ।

त्यसअघि उनी जनप्रिय बहुमुखी क्याम्पमा पढाउँथे । उनको क्षेत्र जलस्रोत र जलसम्पदा हो । उनी माओवादी केन्द्रको कोटाबाट सदस्य भएका हुन् । कास्की मादी गाउँपालिका वडा नम्बर १२ पैह्रेगाउँकी डा. खत्री एमालेको कोटाबाट सदस्य भएकी हुन् । उनी पृथ्वीनारायण क्याम्पसमा समाजशास्त्र तथा मानवशास्त्र प्राध्यापन गर्छिन् ।