पोखरा ।
गण्डकी प्रदेश सरकारको स्थापना दिवसका अवसरमा ४ गते बिहीबार प्रदेशभर सार्वजनिक विदा हुने भएको छ । २०७९ सालमा प्रदेशले दिने सार्वजनिक विदामा उक्त दिन पनि समावेश छ ।

गत वर्ष चैत २३ गतेको मन्त्रिपरिषद बैठकले यो वर्षका विदाबारे निर्णय गरेको थियो । विदाको निर्णय राजपत्रमा प्रकाशित छ । संघ सरकारले दिएका बाहेक पनि प्रदेश सरकारले वर्षमा ६ दिनसम्म विदा दिनसक्छ ।

गण्डकी प्रदेशको तत्कालीन मन्त्रिपरिषदले २०७९ मा असार २९ गते भानु जयन्ती, असोज २३ गते कोजाग्रत पूर्णिमा, फागुन ४ गते प्रदेश सरकार स्थापना दिवस र चैते दसैं चैत १५ गते विदा गर्ने निर्णय गरेको थियो ।

संघ सरकारले फागुन १ गते जनयुद्ध दिवसमा विदा दिएको थियो । त्यसअघि माघ १ गते पोखरामा जहाज दुर्घटना भएपछि २ गते शोकविदा दिएको थियो । त्यसो त सरकारले लोकतन्त्रपछि पहिलोपटक पुस २७ गते पृथ्वी जयन्तीको विदा दिएको थियो । हालैमात्रै प्रधानमन्त्री पुष्पकमल दाहालले सार्वजनिक विदाहरु धेरै भएको बताएका थिए ।