जोमसोम ।
मुस्ताङको थासाङ गाउँपालिका–३ धम्पु सडकमा बस दुर्घटनामा परी गम्भिर घाईते भएका १० जना यात्रुलाई पोखरा रिफर गरिएको छ । म्याग्दी कोरला यातायातको मुस्ताङ रुढमा चल्ने ना ७ ख ७४४० नम्बरको यात्रु सवार बस बुधबार बिहान ८ः३० बजे अचानक दुर्घटना हुँदा बेनी–जोमसोम सडकको बाँया कालिगण्डकी नदीमा खस्न पुगेको थियो ।

बसमा सवार २ भारतीय नागरिकसहित १० जनालाई थप उपचारका लागि पोखरा पोखरा पठाईएको प्रहरी नायव उपरिक्षक(डिएसपी) रविन्द्रनाथ पौडेलले जानकारी दिए । गम्भिर घाईते हुँनेमा भारतीय नागरिक सुनिल पटेल र अपिता गोगय छन् । त्यस्तै बिमती परियार, शर्मिला परियार, लक्ष्मी परियार, सुनिल परियार, राजकुमार बुढाथोकी, उमेश सापकोटा, पेमा छेतेन बिक र सुग्रिब परियार (नाबालक) गम्भिर घाईते भएका हुन् । सामान्य घाईते ७ जनालाई लेते प्राथमिक स्वास्थ्य केन्द्रमा उपचार भईरहेकोमा ३ जना यात्रुलाई पोखरा लैजाने तयारी भईरहेको प्रहरीले जनाएको छ ।

बसमा १२ जना पुरुष,४ जना महिला र १ जना नाबालक यात्रु सवार थिए । बस दुर्घटनाको सूचना भएसंगै जिल्ला प्रहरी कार्यालयबाट प्रहरी निरीक्षक राजकुमार तामाङसहित १५ जना र लेते प्रहरी चौकीबाट ५ जनाको प्रहरी टोली घटनामा स्थलमा पुगेर घाईतेका उद्दारमा खटिएको थियो । घाईतेको उद्दारमा स्थानीयबासीले पनि सहयोग गरेका थिए । समथर स्थानमा के कति कारणले बस दुर्घटना भएको भन्ने बिषयमा अनुसन्धान भईरहेको प्रहरी निरीक्षक राजकुमार तामाङले जानकारी दिए ।