पोखरा ।
नेकपा एमालेका पोलिटब्युरो सदस्य जगत विश्वकर्मालाई पितृशोक परेको छ । विश्वकर्माका ८७ वर्षीय बुवा डिलबहादुर सुनारको आइतबार राति आफ्नै निवास घार्मीमा निधन भएको हो ।

लामो समयदेखि सुगर र प्रेसर रोगबाट पीडित सुनारको हिन्दू परम्परा अनुसार सोमबार दिउँसो स्थानीय देउराली घाटमा अन्त्यष्टि गरिएको छ । जगतलाई उनका कान्छा छोरा जगतले दागबत्ती दिएका थिए ।

विसं १९९३ जेठ २ गते घार्मीमा जन्मेका सुनारले आफ्नो जीवनकालमा महेन्द्र माविको स्थापना, लामाचौर स्वास्थ्य चौकी, घार्मी वृहत खानेपानी, सडक निर्माण लगायतका क्षेत्रमा महत्वपूर्ण योगदान गरेका थिए । दलित अधिकार र ग्रामीण क्षेत्रको विकासमा अगुवाइसमेत गरेका थिए ।

सुनारको शवमा नेकपा एमालेका नेता एवं गण्डकी प्रदेशका मुख्यमन्त्री खगराज अधिकारी, एमाले सचिव पद्मा अर्याल, नेता दामोदर वैरागी, मायानाथ अधिकारी, वाम विश्लेषक झलक सुवेदी, नेता दीपक पौडेल, शोभामोहन पौडेल लगायतले अन्तिम श्रद्धाञ्जली व्यक्त गरेका थिए । डिलबहादुरका१ छोरा जगत र ४ छोरी छन् ।