समाधान संवाददाता
पोखरा
अख्तियार दुरुपयोग अनुसन्धान आयोगका पूर्व आयुक्त राजनारायण पाठक विशेष अदालतले माग गरेको ७८ लाख रुपैयाँ धरौटी बुझाएर छुटेका छन् । ७८ लाख रुपैयाँ घुस मागेको भिडियो सार्वजनिक भएपछि अख्तयारबाट राजीनामा दिएका पाठक बुधबार विशेष अदालतमा हाजिर भएका थिए ।

बुधबारै भएको थुनछेक बहसपछि पाठकसँग विशेषले घुस लिएको विगो रकम बराबर ७८ लाख रूपैयाँ धरौटी माग गरेको थियो । अदालतका अध्यक्ष बाबुराम रेग्मी तथा सदस्यहरु द्वारिकामान जोशी र प्रमोदकुमार श्रेष्ठ वैद्यको इजलासले धरौटी माग गरेको हो । पाठकको धरौटीका लागि नेपाल बंगलादेश बैंक ग्यारेन्टी बसेकाले उनी तारेखमा रिहा भएको विशेष अदालतका उप रजिष्ट्रार पुष्पराज पाण्डेयले जानकारी दिए ।

घुसकाण्डमा मुछिएपछि पदबाट राजीनामा दिएका पाठकविरुद्ध अख्तियारले नै अनुसन्धान गरेको थियो । २०७५ चैत १२ गते उनीविरुद्ध अख्तियारले विशेष अदालतमा मुद्दा दर्ता गराएको थियो । अभियोगपत्रमा पाठकविरूद्ध भ्रष्टाचार निवारण ऐन २०५९ अनुसार कारवाही माग गरिएको छ । भ्रष्टाचार निवारण ऐनको दफा ३ मा घुस लिने व्यक्तिलाई बिगो बमोजिम जरिवाना हुने उल्लेख छ ।

उक्त दफामा ५० लाखदेखि १ करोडसम्म घुस लिने व्यक्तिलाई ६ देखि ८ वर्षसम्म कैद सजाय हुने भनिएको छ । सोही ऐनको दफा २४ मा राष्ट्रपतिले नियुक्त गर्ने संवैधानिक निकायका पदाधिकारीले घुस लिएको पुष्टि भए यी दुवै सजाय हुने भनिएको छ । यो घुस प्रकरण प्रमाणित भए पाठकको हकमा दुवै व्यवस्था आकर्षित हुनेछन् ।

दुवै व्यवस्था अनुसार उनलाई ९ देखि १२ वर्षसम्म कैद हुनेछ । अख्तियारले दर्ता गरेको अभियोग पत्रमा ७८ लाख रूपैयाँ बिगो माग दाबी गरेको छ । ऐन अनुसार कसुर प्रमाणित भए उनले ७८ लाख रूपैयाँ जरिवाना तिर्नुपर्ने छ । सोही बराबरको उनको सम्पत्ति जफत हुनेछ । पाठकलाई घुस दिने चाँगुनारायण, भक्तपुरस्थित नेपाल इन्जिनियरिङ कलेजका अध्यक्ष लम्बोदर न्यौपाने फरार छन् ।