पोखरा ।
गण्डकी प्रदेशका सभामुख कृष्ण धितालले गाउँमै बस्ने वातावरण बनाउन सक्ने हो भने शिक्षाको विकास हुने बताएका छन् । सहिद लखन गाउँपालिका तिनमानेमा अवस्थित जलदेवी माध्यामिक विद्यालयको ४५ औं वार्षिकोत्सव तथा अभिभावक दिवसमा उनले यस्तो बताएका हुन् ।

सभामुख धितालले भने, ‘अहिले गाउँहरु रित्तो हुँदै जाने र विद्यालयमा विद्यार्थी घट्दै जानुले विद्यालयहरु धरासायी बनेका छन् ।’ दक्ष जनशक्ति पलायन आजको मुख्य समस्या भएको उनको ठम्याइ छ । शिक्षाका लागि विद्यालयहरुमा भैतिक प्रगति राम्रो देखिए पनि गुणस्तरीय शिक्षामा उपलब्धि नभएको उनको भनाइ छ ।

गाउँमा रोजगारीको अभाव पनि बसाइँसराइको मुख्य कारक भएको उनले औंल्याए । धितालले भने, ‘शिक्षा पाएपछि आफैं स्वरोजगार हुने र स्वदेशमै केही गर्ने जनशक्तिको अभाव छ । गाउँमा राम्रो शिक्षाको पहुँच नहुँदा बसाइँसराईदेखि अध्यायनका लागि विदेशिनेहरुको संख्या वृद्धि हुँदै गएको छ ।’

तिनमाने वरिपरीको बस्तीमा सुन्तला खेती हुने गरेको स्मरण गर्दै उनले कृषि क्षेत्रको विस्तार र बजारीकरण पनि चुनौति बनेको उल्लेख गरे । सरकारले शिक्षाको विकासमा अर्बाैं खर्च गरे पनि त्यस अनुरुपको परिणाम दिन स्थानीय तहदेखि शिक्षक, स्थानीय बुद्धिजीवी लाग्नु पर्नेमा उनको जोड छ ।

कार्यक्रममा बिद्यालयलाई आर्थिक सहयोग गर्ने, जग्गादाता र अक्षयकोषदाताहरुलाई सम्मान गरिएको छ । कार्यक्रममा सहिद लखन गाउँपालिकाका अध्यक्ष रमेश थापामगर, वडा नं. ५ का वडाध्यक्ष यमबहादुर रानामगर लगायतले बोलेका थिए ।