लेखनाथ ।
लेकसिटी ब्याडमिन्टन क्लब लेखनाथको आयोजनामा सोमबारदेखि तेस्रो राष्ट्रिय खुला ब्यडमिन्टन प्रतियोगिता सुरु भएको छ । पोखरा २९ पटनेरीस्थित बागलुङ समाजको कवडहलमा २२ देखि २४ गते सम्म सञ्चालन हुने प्रतियोगिताको उद्घाटन लेखनाथ उद्योग वाणिज्य संघका अध्यक्ष छत्रधर आत्रेयले गरे ।

अध्यक्ष आत्रेयले खेलको माध्यमबाट शरीरलाई स्वच्छ र साथीभाइबीचमा मित्रताको भावना बढ्ने विश्वास व्यक्त गरेका थिए । विभिन्न चार समूहका बिच हुने खेलहरुमध्ये ए लेबल पुरुष डबलमा १३ टिम, महिला डबलमा सात टिम, पुरुष सुपर भेन्ट्रासमा नौ टिम र बि लेबल पुरुष डबलमा सात टिमले प्रतियोगितामा भाग लिएका छन् ।

प्रतियोगितामा विजयी हुने ए लेबल पुरुष डबलका विजयी समूहलाई ४१ हजार, उपविजेतालाई २२ हजार र सान्त्वना दुई समूहलाई ६/६ हजार नगद सिल्ड, मेडल र प्रमाणपत्र प्रदान गरिने छ । अन्य समूहका विजेतालाई ३५ हजार, उपविजेतालाई १८ हजार र सान्त्वना दुई समूहलाई ६/६ हजार नगद सिल्ड, मेडल र प्रमाणपत्र प्रदान गरिने क्लबका अध्यक्ष रामबहादुर गुरुङले जानकारी दिएका छन् ।