जोमसोम ।
कालिगण्डकी करिडोर (बेनी–जोमसोम) सडक खण्डको अनुगमन तथा निरीक्षण गरिएको छ । मुस्ताङका प्रमुख जिल्ला अधिकारी अनुप केसी, सहायक प्रमुख जिल्ला अधिकारी चन्द्रकान्त बस्नेतसहित सुरक्षा निकायको टोलीले मुस्ताङको काभ्रेभीरदेखि जोमसोमसम्मको सडक अनुगमन गरेको हो ।

सम्वन्धित स्थानमा सडक निर्माणको काम गर्ने निर्माण कम्पनी तथा निर्माण कम्पनीका प्रतिनिधिलाई सडकको काम प्रभावकारी बनाउन निर्देशनसमेत दिइएको छ । टोलीले शर्मा गजुरमुखी जेभी र गौरी पार्वती कन्ट्रक्सनले सडक स्तरोन्नति गरिहेको बेनी–जोमसोम दोस्रो खण्ड र बेनी–जोमसोम चौथो खण्ड खन्ती कोवाङ सडक खण्ड अनुगमन गरेको हो ।

प्रजिअ केसीले सडक निर्माणबारे निर्माण कम्पनीहरुसँग जानकारी लिएका छन् । उनले सार्वजनिक खरिद ऐन अनुसार चालु आर्थिक वर्षसम्म पछिल्लो थपिएको म्याद सकिने भएकाले सोही अनुसार कार्य गर्न निर्माण कम्पनीहरुलाई निर्देशन दिए ।

राष्ट्रिय गौरवको सडक अन्तर्गत बेनी जोमसोम सडकको सबैभन्दा जोखिमयुक्त र अप्ठ्यारो सडक काभ्रेभीर खण्डको सडक स्तरोन्नति तीव्र छ । म्याग्दी र मुस्ताङको सीमानामा पर्ने काभ्रेभीर सडक खण्डमा १ हजार ६ सय मिटर रक कटिङ गरी सडक स्तरोन्नति गरिएको छ ।

अग्लो पडाडको फेंदबाट विस्तार गरिएको काभ्रेभीर सडक २ लेनमा गरी १ हजार ५० सय मिटर ढलान र बाँकी ६ सय मिटर डिबिएसडी प्रविधिको कालोपत्र गरिने शर्मा गजुरमुखी जेभीका महेश कुस्वाहाले जानकारी दिए ।

काभ्रेभीर खण्डमा एकतर्फी आरसिसीको काम करिब ४ सय मिटरमा सकिएको छ । रक कटिङ पनि अन्तिम चरणमा पुगेको छ । बेनी–जोमसोम सडक अन्तर्गत शर्मा गजुरमुखी जेभीले म्याग्दीको तातोपानीदेखि मुस्ताङको घाँसासम्म ७० प्रतिशत भौतिक प्रगति गरेको छ ।

२०७४ मा सडक स्तरोन्नति सुरु गरिएको सडकको पटक पटक म्याद थपिएको थियो । ७२ करोडमा सडक स्तरोन्नति तथा कालोपत्र गर्ने जिम्मा पाएको शर्मा गजुरमुखीले फागुनदेखि निर्माणको कामलाई गति दिएको हो । म्याग्दीमा कमजोर भूसंरचनाका कारण बाढी, पहिरोले सडकमा क्षति हुँदा निर्माण प्रभावित हुँदै आएको छ ।

म्याग्दी र मुस्ताङको प्रबेशद्वार काभे्रभीर सडक खण्डमा आरसिसी र डिबिएसडी कालोपत्र सकिएमा मुस्ताङ आउजाउ गर्ने सवारी साधनलाई निकै सहज हुनेछ । शर्मा गजुरमुखीले मुस्ताङको कैकुखोलादेखि कोवाङसम्मको सडकमा कालोपत्रसहित सडक निर्माणको काम अन्तिम चरणमा पुर्‍याएको छ । बेनी–जोमसोम तेस्रो खण्ड अब करिडोर सडकलाई हस्तान्तर गर्ने चरणमा रहेको आयोजनाले बताएको छ ।

कोवाङ जोमसोम सडकको खन्तीदेखि मार्फासम्म सबैजसो स्थानमा कालोपत्र भईसकेको छ । गौरी पार्वती निर्माण कम्पनीले जिम्मा लिएको यो सडकमा अहिलेसम्म ६५ प्रतिशत भौतिक प्रगति छ । मार्फादेखि जोमसोमसम्मको सडकमा भने सडक स्टक्चर मिलाउने, ड्रेन निर्माण गर्ने, फिलिङ गर्ने र जोमसोम बजार क्षेत्रमा करिव १ सय मिटरमा सडक ढलान गरिने बताइएको छ ।

खन्ती जोमसोम १६ किमी सडकको लागत ६२ करोड ४८ लाख छ । निर्माण कम्पनीले खन्तीदेखि मार्फासम्म १६ किमीमध्ये ८ किमी सडकमा दुईतर्फी अस्फाल्ट कालोपत्र गरिसकेको छ ।

नमुना कालोपत्र सडक
बेनी–जोमसोम सडकको मुस्ताङको खण्डको सडकले यहाँ आउने पर्यटकलाई लोम्याउने गरेको छ । बेनी–जोमसोम सडकको मुस्ताङ खण्डमा करिब ३० किमी सडक कालोपत्र भईसकेको छ ।

म्याग्दीको जोखिमयुक्त र अप्ठ्यारो सडक छिचोल्दै मुस्ताङ प्रवेश गर्ने पर्यटक यहाँको कालोपत्र सडक देखेर दंग पर्छन् । आयोजनाको ११ मिटर फराकिलोसडकमा सवारी साधनलाई निकै सहज छ ।

नीलगिरी र धौलागिरी हिमालको काखमा मुस्ताङको कैकु मार्फा सडक निकै मनमोहक देखिन्छ । मुस्ताङ सडक कालोपत्र अन्तिम चरणमा पुगेसँगै मुक्तिनाथ दर्शन र मुस्ताङ भ्रमण गर्ने आन्तरिक तथा बाह्य पर्यटकलाई निकै सहज भएको छ ।