पोखरा ।
जिल्ला समन्वय समिति महासंघ गण्डकी प्रदेश समितिको समन्वय र गण्डकी प्रदेश प्रशिक्षण प्रतिष्ठानको आयोजनामा गण्डकी प्रदेशका जिसस पदाधिकारी र सदस्यहरूका लागि आयोजित अभिमुखीकरण तालिम सोमबार पोखरामा भएको छ ।

कार्यक्रम गण्डकी प्रदेशका मुख्यमन्त्री खगराज अधिकारीले उद्घाटन गरेका थिए । त्यस अवसरमा अधिकारीले तीन तहका सरकार बिच समन्वय गर्ने उद्देश्यले स्थापित जिल्ला समन्वय समितिलाई संविधानले दिएका दायराभित्र रही प्रभावकारी काम गर्न अभिमुखीकरण फलदायी हुने विश्वास व्यक्त गरे ।

जिल्ला समन्वय समिती महासंघ गण्डकी प्रदेशका अध्यक्ष लीलाधर पौडेलले अनुगमन र समन्वयका काम प्रभावकारी रूपले सम्पन्न गर्न अभिमुखीकरण आयोजना गरिएको जनाए । गण्डकी प्रदेश सरकारका प्रमुख सचिव रविलाल पन्थले समन्वय संरचना जीवन्त र कार्य वातावरण सहज बनाउन विभिन्न समयमा अभिमुखीकरण आबश्यक हुने उनले औंल्याए ।

नेपाल सरकारका पूर्व मुख्य सचिव सोमलाल सुवेदी र गण्डकी प्रदेश प्रशिक्षण प्रतिष्ठानका कार्यकारी निर्देशक ऋषिराम पाण्डेले सहजीकरण गरेका थिए । कार्यक्रमको पहिलो चरणमा गण्डकी प्रदेशका एघार जिल्लाका जिल्ला समन्वय समितिका प्रमुख, उपप्रमुख र दुईजना सदस्य गरी करिब ५० जनाको सहभागिता थियो ।

गण्डकी प्रदेश प्रशिक्षण प्रतिष्ठानका कार्यकारी निर्देशक ऋषिराम पाण्डेको अध्यक्षतामा सम्पन्न उद्घाटन सत्रको सञ्चालन प्रतिष्ठानका शाखा अधिकृत बाबुराम न्यौपानेले गरेका थिए ।