पोखरा ।
नेत्र ज्योति संघको आयोजना र नेपाल पत्रकार महासंघको समन्वयमा एक दिने निशुल्क आँखा शिविर हुने भएको छ । पत्रकार महासंघ कास्की परिसरमा हुने महासंघको ६७ औं स्थापना दिवस र नेत्रज्योति संघको ४५ औं स्थापना दिवसको उपलक्ष्यमा सोमबार शिविर हुन लागेको हो ।

देशका सातै प्रदेशमा रहेका पत्रकारका लागि निशुल्क शिविर आयोजना गर्ने समझदारी बमोजिम गण्डकी प्रदेशको लागि पोखरामा सोमबार बिहान ८ बजेदेखि १२ बजेसम्म शिविर तय भएको छ ।

शिविरमा आँखा जाँच गराउने पत्रकारका लागि आवश्यक परेमा चश्मादेखि शल्यक्रियासमेत निशुल्क गरिने नेत्रज्योति संघ कास्कीका अध्यक्ष कृष्णबहादुर गुरुङले जानकारी दिए ।

पत्रकारका लागि शिविर सञ्चालन गर्ने केन्द्रको नीति बमोजिम पोखरामा शिविर गर्न लागिएको नेत्रज्योति संघ कास्की सचिव सुरेन्द्र थापाले बताए ।

नेपाल पत्रकार महासंघ गण्डकी प्रदेश समितिको संयोजन र नेत्रज्योति संघ अन्तर्गत रहेको हिमालय आँखा अस्पतालको आयोजनामा हुने शिविरको तयारी पूरा भएको पत्रकार महासंघ गण्डकी प्रदेश समिति सचिव यदुनाथ बन्जाराले बताए ।