पोखरा ।
यो दाजुको मिरमिरे आँखा, फूल मायामा नभूल लगायतका कालजयी गीतका गायक प्रवीण गुरुङको स्मृतिमा विशेष कार्यक्रम भएको छ ।

कास्कीको लुम्लेमा उनको स्मृतिमा सांगीतिक एवं स्रस्टा सम्मान कार्यक्रम भएको हो । कार्यक्रममा अन्नपूर्ण गाउँपालिकाका प्रमुख विष्णुबहादुर केसीले अन्नपूर्ण गाउँपालिकाकाको पहिचान बढाउन गायक गुरुङले संगीतका माध्यम महत्वपूर्ण भूमिका खेलेको उल्लेख गरे । यस्ता कार्यक्रमको निरन्तरताले सर्जकको सच्चा सम्मान हुने विश्वास उनको छ ।

कार्यक्रमको दोस्रो दिन सोमबार प्रवीण गुरुङ स्मृति पुरस्कार गम बहादुर गुरुङलाई प्रदान गरिएको छ । उनलाई नगद १० हजार, दोसल्ला र सम्मान पत्र प्रदान गरियो । गमबहादुर प्रवीणका सहयात्री हुन् ।

सो अवसरमा अन्नपूर्ण गाउँपालिकाले लोकदोहोरी गायक बाबुराम पौडेललाई सम्मान गरेको छ । उनलाई नगद १० हजार, दोसल्ला र सम्मानपत्र प्रदान गरियो । मंगलबार साँझ लेकाली ब्यान्ड र नवीन गुरुङको प्रस्तुति रह्यो ।