पोखरा ।
समानान्तर साहित्यिक मञ्च पोखराले मानव सेवा आश्रम छोरेपाटनबाट कविता वाचन तथा गायन श्रृंखला सुरुआत गरेको छ ।

साहित्य, संगीत र कलाले उत्पीडित र आधारभूत वर्गको आवाज बोल्दै समता र मानवताले भरिभराउ समाज निर्माणमा सहयोगी भूमिका खेल्नुपर्ने अवधारणसहित मञ्चले आश्रमबाट कार्यक्रम थालेको हो ।

घरपरिवार, समाज र राज्यबाट उपेक्षित भएर आश्रमको शरणमा रहेका महिला आश्रित आश्रममा मञ्चका सदस्यले कविता वाचन र गायनसँगै व्यक्तिगत रुपमा आर्थिक सहयोगसमेत गरेका छन् ।

अध्यक्ष विश्वराज रसाईली, सचिव सुरेन्द्र विश्वकर्मा, कोषाध्यक्ष राजु परियार, सदस्यहरु मनोज विक भावुक, बुद्धिबहादुर विश्वकर्मा, सिबी संगम र सविना सुनामले कविता तथा गीत प्रस्तुत गरेका थिए । सविना सुनाम र दिया परियारले गीत सुनाए भने अनुपम रिजालले वाद्यवादनमा साथ दिएका थिए ।

श्रृंखलाका नायक कलाकार राम नेपालीले कलाकार र साहित्यकारले उत्पीडित वर्गको आवाज बोल्नुपर्नेमा जोड दिए ।

माछापुच्छे गुठी समाजका अध्यक्ष शालिकराम नेपाली, मञ्चका सदस्य प्रेम नेपाली, मनोज विक भावुक, कोषाध्यक्ष राजु परियार लगायतले कार्यक्रममा बोलेका थिए ।

संस्थाका अध्यक्ष विश्वराज रसाइलीले साहित्य तथा कला जुनसुकै विधा भए पनि मानवता र समानताले भरिएको हुनुपर्नेमा जोड दिए । आगामी दिनमा पनि समानान्तरले सामाजिक न्याय, समानता र मानवताका लागि हरेका खालका विभेद विरुद्ध आवाज बुलन्द गर्ने प्रतिवद्धता गरे ।