पोखरा ।
ज्येष्ठ नागरिक समाज भलामको पहिलो अधिवेशनले तदर्थ समितिलाई नै निरन्तरता दिएको छ । समाजको अध्यक्षमा लोकबहादुर खत्री, उपाध्यक्ष कृष्णबहादुर कार्की, सचिव गणेशबहादुर खत्री र कोषाध्यक्ष गोविन्दप्रसाद बास्ताकोटी छन् ।

शुक्रबार भएको अधिवेशनबाट सदस्यमा विष्णुबहादुर खत्री, शम्शेर केसी, लक्ष्मी कार्की, सरस्वती गौतम र गीता खत्री चुनिए ।

समितिको कार्यकाल ३ वर्ष छ । कार्यक्रममा पोखरा २० का वडाध्यक्ष गंगाबहादुर खत्रीले वडाको विकासका लागि सबैसँग सहकार्य गरी योजनावद्ध रुपमा काम भइरहेको बताए । उनले ज्येष्ठ नागरिकको सहज जीवनयापन, उपचार र सुरक्षाका लागि स्थानीय सरकार, समाज र सबै नागरिकको भूमिका रहनुपर्नेमा जोड दिए ।

समाजका अध्यक्ष लोकबहादुर खत्रीको अध्यक्षतामा भएको कार्यक्रममा पण्डित श्रीकान्त सुवेदीले पनि बोलेका थिए । नयाँ वर्षको शुभकामना आदानप्रदानसमेत गरिएको कार्यक्रममा ८० वर्ष पुगेका १५ ज्येष्ठ नागरिक सम्मानित भएका थिए । भलाममा यो समाज गठनका लागि महेन्द्रराज पौडेलले विशेष भूमिका निर्वाह गरेका छन् ।

सभामा संस्थाको प्रगतिबारे सचिव गणेशबहादुर खत्री र कोषाध्यक्ष गोविन्दप्रसाद बस्ताकोटीले आर्थिक प्रतिवेदन पेश गरेका थिए ।