पोखरा ।
राष्ट्रिय स्वतन्त्र पार्टीका सांसद ढाकाकुमार श्रेष्ठले आफूलाई साधारण सदस्य र सांसदबाट बर्खास्त गर्ने पार्टी निर्णयविरुद्ध पुनरावेदन गरेका छन् । पार्टी केन्द्रीय कमिटीले आफूलाई साधारण सदस्यबाट पनि निष्कासित गरेपछि त्यसविरुद्ध सफाइका लागि उनी आइतबार पुनरावेदनमा गएका हुन् ।

कारबाही घोषणाका क्रममा सभापति रवि लामिछानेले पनि ढाकालाई पुनरावेदन सुविधा हुने बताएका थिए । रास्वपा पुनरावेदन समितिमा विपिन आचार्य, अग्निशिखा धिताल र दीपक बोहोरा छन् । मेडिकल व्यवसायी दुर्गा प्रसाईंसँग २ करोड रुपैयाँ घूस मागेको अडिओ प्रकरणमा रास्वपाले सांसद श्रेष्ठलाई कारबाही निर्णय गरेको थियो ।

डा. भरतमणि देवकोटा संयोजक र सदस्यहरु रामहरि सुवेदी, रमाकान्त रिमाल र यज्ञमणि न्यौपानेको समितिले सांसद श्रेष्ठलाई कारबाही सिफारिस गरेको थियो । त्यही समितिको सिफारिसका आधारमा रास्वपाले श्रेष्ठको सांसद पद खोस्दै पार्टीबाट पनि निष्कासन गरेको थियो ।