पोखरा ।
सातौं संस्करणको ‘पोखरा स्पोर्ट्स अवार्ड २०७९ को तयारीमा तीव्रता दिइएको छ । नेपाल खेलकुद पत्रकार मञ्च गण्डकीको आयोजनामा हुन कार्यक्रमलाई भव्य बनाउन गठन भएको मुल आयोजक समिति तथा १३ उपसमितिले आफ्नो जिम्मेवारी अनुसारका काम अघि बढाएको मञ्चका महासचिव राजाराम पौडेलले बताए ।

२३ गते शनिबार पोखरा सभागृह हलमा हुने अवार्ड कार्यक्रममा लाइफटाइम अचिभमेन्ट अवार्ड, वर्ष खेलाडी पुरुष, वर्ष खेलाडी महिला, वर्ष उदीयमान खेलाडी, वर्ष उत्कृष्ट प्रशिक्षक, वर्ष उत्कृष्ट खेलकुद संघ, संस्था वा क्लब र वर्ष उत्कृष्ट खेल पत्रकारलाई अवार्ड प्रदान गरिने प्रचारप्रसार उपसमितिका संयोजक समेत रहेका महासचिव पौडेलले जानकारी दिए ।

मञ्चले मंगलबारसम्ममा ४ विधाको नोमिनेसन सार्वजनिक गर्ने भएको छ । वर्ष खेलाडी पुरुष, वर्ष खेलाडी महिला, वर्ष उदीयमान खेलाडी र वर्ष उत्कृष्ट प्रशिक्षकतर्फ वर्ष २०७९ मा उनीहरुले प्राप्त गरेका उपलब्धि समेतलाई आधार बनाएर तीन–तीन जनाको नाम छनोट गरेर नोमिनेसन सार्वजनिक गरिनेछ ।

कार्यक्रमका लागि नेपाल भूतपूर्व खेलाडी मञ्चले अवार्ड कार्यक्रममा सघाउने भएको छ । अघिल्लो सस्करणको अवार्ड कार्यक्रममा लाइफ टाइम अचिभमेन्ट अवार्डको पुरस्कारको प्रायोजन गरेको भूतपूर्व खेलाडी मञ्चले यसपालि २५ हजार रुपैयाँ सहयोग गर्ने भएको हो ।

सहारा हङकङले अवार्ड कार्यक्रमका लागि १० हजार रुपैयाँ सहयोग गरेको छ । सहयोग रकम सहारा हङकङका अध्यक्ष दीपक गुरुङले मञ्चका अध्यक्ष दीननाथ बराललाई हस्तान्तरण गरे ।