जोमसोम—मुस्ताङको मुक्तिनाथमा (हाईअल्टिच्युड) लेंक लागेर एक भारतीय महिलाको मृत्यु भएको छ । भारतको बैङ्लोरदेखि मुस्ताङको पवित्र धार्मिक स्थल मुक्तिनाथ दर्शन गर्न आएकी ६७ वर्षीया सौभाग्यवतीको लेंक लागेर मृत्यु भएको जिल्ला प्रहरी कार्यालय मुस्ताङले जनाएको छ ।
भारतको बैङ्लोर देखि २५ जनाको भारतीय दर्शनार्थाी टोली पोखरा—जोमसोम हवाई सेवा मार्फत बिहिबार बिहान मुस्ताङको जोमसोम आईपुगेका थिए । उनीहरु जोमसोमबाट बस चढेर मुक्तिनाथ मन्दिर पुगेका थिए ।
मुक्तिनाथ मन्दिरको १०८ धारामा स्नान गर्दैगर्दा मृत्यु भएकी सौभाग्यवती लेंक लागेर ढलिन् ।उनी श्वासप्रश्वासमा समस्या देखिएका कारण बेहोस भएकी थिईन । उनलाई ट्याक्सीमा राखेर उपचार गर्न जोमसोम अस्पताल ल्याउने क्रममा चिकित्सकले मृत घोषणा गरेको जिल्ला प्रहरी कार्यालय मुस्ताङका सूचना अधिकारी धनबहादुर अधिकारीले जानकारी दिए । घटना बारे अनुसन्धान भईरहेको प्रहरीले जनाएको छ ।
यता, मृतकका आफन्तहरुले लेंक लागेर मृत्यु भएकी महिलाको लागि मुक्तिनाथमा तत्काल अक्सिजन र उपचारको व्यवस्था हुन नसकेको बताएका छन् ।उनीहरुले मुक्तिनाथमा अक्सिजन र प्रारम्भिक उपचार हुन नसकेको उल्लेख गरे ।
मुक्तिनाथमा योसंगै चालु वर्षको ६ महिनामै ११ जनाले हाईअल्टिच्युड अर्थात लेंक लागेर मृत्यु भईसकेको जिल्ला प्रहरी कार्यालय मुस्ताङले उल्लेख गरेको छ । मुस्ताङ अस्प्ताल जोमसोमका एमडिजिपी डाक्टर मुखिया घलेले पछिल्लो समय लेंक लागेर भारतीय पर्यटकको मृत्यु हुने क्रम बढेको बताए । उनका अनुसार कतिपय भारतीय पर्यटकले उच्चउचाईको भूगोलमा होल्डिङ नगरी आउने गरेको, स्वास्थ्य परीक्षण नगर्ने र दीर्घ रोगी का समस्या भएका भारतीय पर्यटकहरुले आवश्यक सजगता अपनाउन नसक्दा लेंक लागेर स्वास्थ्य समस्या आउने गरेको बताए । मुस्ताङ आउँने भारतीय पर्यटकलाई स्वास्थ्य सचेतना सम्वन्धि जानकारी दिन आवश्यक रहेको औल्याए ।
मुक्तिनाथ मन्दिर समुन्द्री सतहदेखि ३८ सय मिटरको उचाईमा अवस्थित छ ।