पोखरा ।
गाउँपालिका महासंघ गण्डकी प्रदेश समितिले गण्डकी प्रदेशका मुख्यमन्त्री सुरेन्द्रराज पाण्डेलाई खुद्रा बजेट बनाउन आग्रह गरेको छ । महासंघले मुख्यमन्त्री पाण्डेलाई ज्ञापनपत्र बुझाउँदै साना आयोजनाले नतिजा निकाल्न नसकिएको भन्दै ठूला आयोजनामा जोड दिन आग्रह गरेको हो ।

‘स–साना आयोजना तथा कार्यक्रममा बजेट पठाउँदा कार्यान्वयनमा दोहोरोपना आउने, व्यवस्थापन लागत बढी लाग्ने र अनुगमन तथा सुपरीवेक्षणमा समेत समस्या परेको छ । प्रदेश सरकारबाट विनियोजन गर्ने विकास आयोजनाहरुलाई खुद्रा रूपमा नभई ठूला आयोजनामा मात्र जोड दिन आग्रह गर्दछौं । साथै, योजना बैंक बनाई तल्लो तहबाट माग भई आएको योजना प्राथमिकतामा राख्न प्रदेश सरकारको ध्यानाकर्षण गर्दछौं,’ ज्ञापनपत्रमा भनिएको छ ।

प्रदेशले सुरु गरेर अधुरा रहेका आयोजना पूरा गरेरमात्रै अरु आयोजनामा लगानी गर्न महासंघको माग छ । ज्ञापनपत्रमा भनिएको छ, ‘प्रदेश सरकारबाट सुरु गरिएका अधुरा आयोजना पूरा गरेर मात्र अन्य आयोजनामा लगानी गर्नुपर्छ । प्रदेश सरकारले सञ्चालन गर्ने आयोजना तथा कार्यक्रम कम्तीमा प्रदेशको गौरव र समग्र विकासमा योगदान पुग्ने प्रकारका हुनुपर्यो ।’

प्रदेशले पालिकालाई दिने समपुरक कोषको आकार बढाउनुपर्ने, सशर्त अनुदानभन्दा समानीकरण अनुदानमा ध्यान दिनुपर्ने, स्थानीय सरकारको कानुन निर्माण गर्दा पालिकासँग समन्वय गर्नुपर्ने माग गरिएको छ । महासंघका गण्डकी अध्यक्ष नवराज ओझा, सचिव जोकलाल बुढा, सहसचिव सीता अधिकारी सहितको टोलीले मुख्यमन्त्रीलाई ज्ञापनपत्र बुझाएको हो ।