जोमसोम ।

मुस्ताङको वारागुङ मुक्तिक्षेत्र गाउँपालिका—४ कागबेनीस्थित काग छोदे गुम्बामा पाँचौं विश्वशान्ति प्राणिधान (मोन्लम)पूजा बुधबार सकिँदै छ । पूजा शनिबार सुरु भएको थियो । मुस्ताङ शाक्या बौद्ध संघको आयोजना तथा व्यवस्थापनमा सञ्चालन भएको पूजामा विश्व शान्तिको कामना गरिएको थियो ।

संघले बर्सेनि यस प्रकारको धार्मिक पूजा मुस्ताङमै रहेका गुम्बाहरुले आलोपालो आयोजना गर्ने गरेका छन् । पूजाको पहिलो, दोस्रो र तेस्रो दिनको कार्यक्रममा दिनहुँ स्थवीर पूजा र प्राणिधानको उच्चारण, चौथो दिनको कार्यक्रममा तीनै रिन्पोछेहरुको अध्यक्षतामा सबै संघहरुद्वारा सर्वविद वैरोचना शुद्धीकरणविधिको वाचना भयो । पाँचौं तथा अन्तिम दिन आर्या आवालोकेश्वर अभिषेक (वाङ) र स्थानीयलाई धार्मिक प्रवचन दिइने कार्यक्रम छ ।

पूजाको अध्यक्षताका लागि शाक्या परम्परा अनुसार भारतको देहरादुनबाट ४२ औं गद्दिधारी शाक्या ठ्रिजिन रत्न बज्र रिन्पोछेलाई मुस्ताङ आमन्त्रण गरिएको छ । उनीसँगै मुस्ताङकै शाक्या समुदायका दुई प्रमुख लामाहरु पनि पूजामा सहभागी रहेको मुस्ताङ शाक्या बौद्ध संघका अध्यक्ष खेन्पो तेन्जिङ साङ्वो गुरुङले जानकारी दिए । मुस्ताङमा आयोजित विश्व शान्ति पूजा जिल्लाकै ठूलो ऐतिहासिक र धार्मिक पूजा भएको बताए ।

चौथो विश्व शान्ति पूजा लोमान्थाङ—३ ठिंगरको नाम्गेल आनी गुम्बामा सम्पन्न भएको थियो । विश्व शान्ति पूजा आयोजना गरिनु गौरवको विषय भएको वारागुङ मुक्तिक्षेत्र गाउँपालिकाका अध्यक्ष रिङझिङ नाम्गेल गुरुङले जानकारी दिए ।

पूजामा तल्लो मुस्ताङदेखि उपल्लो मुस्ताङका २५ वटा गुम्बा र १२ वटा गुम्बा विद्यालयको सहभागिता रहेको गण्डकी प्रदेशका पूर्व सांसद ईन्द्रधारा बिष्टले जानकारी दिए । पूजाको अन्तिम दिन उपल्लो मुस्ताङदेखि तल्लो मुस्ताङका सयौं सर्वसाधारणले ४२ औं गद्दिधारी शाक्या ठ्रिजिन रत्न बज्र रिन्पोछेको हातबाट अभिषेक (वाङ) थाप्न जाने बताइएको छ ।