पोखरा ।
लायन्स क्लब इन्टरनेसनल डिस्ट्रिक्ट ३२५ एमको आयोजना एवं लायन्स क्लब अफ पोखरा लेकसाइडको आतिथ्यता एवं संयोजनमा कास्कीको पर्यटकीय गाउँ घान्द्रुकमा जेठ २७ गते चौथो क्याबिनेट बैठक हुने भएको छ ।

बैठकमा विभिन्न जिल्लाका १४० लायन्स क्लबका ४ सयभन्दा बढी लायनहरू सहभागी हुने लायन्स क्लब अफ पोखरा लेकसाइडका अध्यक्ष लायन कृष्णकुमार श्रेष्ठले जानकारी दिए । सामाजिक सेवाका हरेक क्षेत्रमा क्रियाशील लायन्स क्लब इन्टरनेसनल डिस्ट्रिक्ट ३२५ एम अन्तर्गतका क्लबहरूले आआफ्नो स्थानमा विशिष्ट योगदान पुर्‍याउँदै आएको सुनाए । उनले यो बैठकबाट घान्द्रुकको पर्यटकीय विकासमा योगदान पुग्ने विश्वास लिइएको बताए ।

कार्यक्रम संयोजक लायन जगन्नाथ तिमल्सिना (जयराम) का अनुसार घान्द्रुकमा हुने बैठकको तयारी तीव्र पारिएको छ । गाउँ पर्यटनको समेत विकास गर्ने उद्देश्य अनुरुप सहरी क्षेत्र बाहिर कार्यक्रम आयोजना गरिएको उनले बताए । ४ सयभन्दा बढी लायनहरूको उपस्थितिमा घान्द्रुकमा हुन लागेको बैठकले यस क्षेत्रको पर्यटनमा विशिष्ट योगदान पुग्ने विश्वास लिइएको छ ।