समाधान संवाददाता
जोमसोम

मुस्ताङको वारागुङ मुक्तिक्षेत्र गाउँपालिका २ पुडाकका स्थानीयले बुधबार अमेरिकी राजदुत र्‍यान्डी बेरीलाई स्वागत गरेका छन् । पुडाकको जनसेवा आधारभूत विद्यालयको इजिआरपी कक्षा अनुगमनमा आएका बेरीलाई गाउँपालिका, स्थानीय, गाउँ समाज, आमा समूह र क्लबका सदस्यले स्वागत गरेका हुन् ।

गाउ समाजले उनलाई गुरुङ समुदायले लगाउने तिब्बतीयन टोपी लगाइदियो । गाउँपालिका अध्यक्ष फेञ्चोक छेप्तेन गुरुङ, प्रमुख प्रशासकीय अधिकृत दीपक रेग्मी र शिक्षा विकास तथा समन्वय इकाइ प्रमुख टकराज बराल लगायतले उनलाई स्वागत गरे ।

उपल्लो मुस्ताङको लोघेकर दामोदरकुण्ड गाउँपालिकाको घमी स्थित घमी आधारभूत र लोमान्थाङ स्थित राष्ट्रिय आधारभूतको इजिआरपी कक्षा बेरीले अनुमगन गर्ने समन्वय इकाइ प्रमुख बरालले जानकारी दिए । राजदुत बेरी उपल्लो मुस्ताङको कार्यक्रम सकेर शुक्रबार जोमसोम फर्किने कार्यक्रम छ । मुस्ताङको छैरो तिब्बतीयन क्याम्पमा अमेरिकाले सहयोग गर्दै आएको छ ।