राकेश शर्मा
म्याग्दी

म्याग्दीका अधिकांश ग्रामीण क्षेत्र सडक सञ्जालमा जोडिएपछि स्थानीय उत्साहित भएका छन् । सडक सञ्जालमा जोडिएपछि दुर्गमका बासिन्दाको दैनिकी सहज बनेको छ ।

सडक सुविधा नहुँदा गन्तव्यमा पुग्न घन्टौं पैदल यात्रा गर्नुपर्ने बाध्यता थियो । गाउँमा मोटर बाटो निर्माण भएपछि सहरमा बसाइँसराइँ गरेकाहरु पनि दंग छन् । म्याग्दी सदरमुकामदेखि करिब ५० किलोमिटर पश्चिम मालिका ७ रुम गाउँका स्थानीय बलबहादुर विक सडक पुगेपछि स्थानीय उत्पादनले सजिलै बजार पाउने विश्वास व्यक्त गरे ।

पहिले कृषि उत्पादन बजारमै कुहिन्थ्यो तर सडक पुगेपछि उत्पादनले मूल्य पाउने धौलागिरि ७ का अध्यक्ष कलानिधि शर्माले बताए । सडक सुविधा भएपछि पर्यटन प्रवद्र्धनमा समेत सहयोग पुग्ने उनको भनाइ थियो । सहरमोह केही हदसम्म घट्ने रघुगंगा गाउँपालिका ३ का अध्यक्ष जीवन मल्लको भनाइ छ ।

म्याग्दीमा १ नगरपालिका र ५ गाउँपालिका छन् । सबै स्थानीय तह सडक सञ्जालमा जोडिए पनि धौलागिरि र रघुगंगा गाउँपालिकाका केही वडा भने सडक सञ्जालमा जोडिएका छैनन् ।