दमौली ।

तनहुँको व्यास नगरपालिकाले दमौलीका ५ निजी हस्पिटलमा बुधबार अनुगमन गरेको छ । जिल्ला प्रशासन कार्यालय तनहुँको समन्वयमा नगरपालिकाले बुधबार समधान, सिटी जनरल, नेसनल एपोलो, व्यास नगर र रत्नहरि हस्पिटलमा अनुगमन गरेका हो ।

अनुगमनको क्रममा नवीकरण नभएको, म्याद सकिएको बिटाडिन, मापदण्ड अनुसार फोहोर मैलाको उचित व्यवस्थापन नभएको, नगरपालिकामा नियमित प्रतिवेदनको रिपोटिङ नगरेको जस्ता कमजोरी देखिएको नगरपालिकाका प्रमुख प्रशासकिय अधिकृत गंगालाल सुवेदीले जानकारी दिए । धेरैजसो अस्पतालमा मापदण्ड अनुसारको फोहोर मैला व्यवस्थापन नभएको पाइएको स्वास्थ्य शाखा प्रमुखप्रमोद सोतीले बताए ।

सहायक प्रमुख जिल्ला अधिकारी काशीराम गैह्रैले नीतिगत रुपमा हस्पिटलको सञ्चालन हुनुपर्ने बताए । अनुगमनमा स्वास्थ्य कार्यालय तनहुँका प्रमुख शंकरबाबु अधिकारी, व्यास नगरपालिकाको जनस्वास्थ्य निरीक्षक लक्ष्मी गुरुङ लगायत सहभागी थिए ।